智取大市：資源商品寧吼信義
■信義玻璃最新經營風電業務；圖為集團主席李賢義。 資料圖片
之前港股反彈浪之中最強的板塊，莫過於跌得殘、彈得高嘅資源商品類股份，當中有中煤（1898）、鞍鋼（347）、安徽海螺（914），佢哋有一個共通點，就係身處於中央矢志削減落後產能嘅板塊，呢啲行業除咗
鋼鐵、水泥、煤炭以外，其實仲有玻璃。香港上市嘅產能過剩行業股份，多數隨住行業低迷而令盈利能力下降，但信義玻璃（868）就係一個例外。
信義玻璃同時經營浮法玻璃同建築玻璃，最新經營埋風電業務，同時持有28.82%信義光能（968）股權，即有埋光伏業務。信義舊年收入上升5.5%，純利升55%，至21.13億元，每股盈利53.88仙。業績長期跑贏同業，原因係佢嘅融資成本只有2厘左右，加上規模效應，經營成本比行家低，當正常一間玻璃行家收支平衡之際，信義就已經大賺。方程式仲要複製喺光伏同風電，其中，喺低成本生產光伏玻璃同時，亦能夠爭取多個光伏項目，最近撈埋風電，反映間公司不停搵財路搵增長，有行業優勢同時又夠進取。佢嘅業務周期或許同其他周期性股份一樣，但盈利能力卻高一籌。
之前提過港股4、5月係觀察期，如果恒指冇破底，踏入6、7月港股單日成交回升至800億、900億元水平，就反映大陸走資問題見底，之後或出現一輪升市。到時產能過剩行業成為國策受惠股，唔差得去邊，買信義玻璃就應該冇衰。
晉佳
http://www.facebook.com/advanceguy1
晉佳
智取大市 - 晉佳 舊文
來源 source: http://hk.apple.nextmedia.com