利好漸出清
2016/04/20 09:02:08
網誌分類: 經濟
油價上漲以及好過預期的企業業績報告，提振投資者信心。標普500指數升6點，收報2101點，係去年12月1日以來首次收於2100點樓上；杜指升49點，收報18054點，創9個月新高；納指逆市跌20點至4940點。
納指跑輸
大市，主要係網上電視公司Netflix和生命科技公司Illumina業績唔得，股價大跌所拖累，Netflix上季度用戶人數增長差過預期，股價大插13%，而Illumin營收遠差過預期，又發出4年以來最差的盈利預警，股價大插23%！另外，Netflix股價大插，亦拖累其他科技股如Google 母公司Alpabet跌1.7%；亞馬遜跌1.2%。
IBM昨日公佈業績，盈利雖然好過預期，但季度營收連續下滑，而且沒有提高全年的盈利預測，股價遭到拋售，大跌5.6%，係表現最差杜指成份股，單係IBM，拖低杜指大約57點。IBM股價大跌，亦令到投資者對科技股卻步。
昨日如果唔係油價回升，美股已經見紅。
紐約5月期油結束連續4日跌勢，升3.3%至每桶41.08美元，轉至6月份的期油合約，收報42.47後美元，再升3.1%。杜瓊斯能源指數升1.9%，油價造好，
亦有利銀行股反彈超過1%，成為推動大市上升的雙頭馬車。
紐約市場分析師話，美股近日之所以持續走上，原因包括1. 聯儲局的鴿派表現為市場打底；2. 美元轉弱；3. 油價脫離了低位；4. 中國經濟及股市都比較平靜。
佢又補充，美企季度業績的影響仍未浮出水面，暫時所見，都似乎係好壞不一，過去連續四季，美企盈利都係負增長，但市場預期第二季將會有改善，例如強生、菲利浦莫里斯等都上調盈利預期。包括Illinois Tool，Caterpillar、Honeywell及通用電氣等多家工業巨頭即將公佈業績，昨日的股價都有輕微進賬，反映投資者對這些公司的成績有信心。佢認為如果工業股業績理想的話，杜指不難再上歷史高位，畢竟杜指離去年創的高位相差300點而已。
股市就係咁，有人睇好，就有人睇淡。向來係大淡友的Pento Portfolio Strategies的總裁Michael Pento就叫投資者，綁好完全帶，因為美股有機會大跌25%！主要原因在於美股缺乏基本因素支持指數再上。他認為投資者希望持續下跌的美元可以推高整個股市，這是錯誤的賭博。反映美元兌6隻主要貨幣匯價的美元指數由今年1月中的短期高位99.52一路回落至4月中時的93.62，大跌6%，而美元下跌係推動美股反彈的主要推手。市場拋售美元則拜聯儲局主席耶倫改變了今年會加4次息的態度所賜。
Michael Pento指出美元指數近日已經有反彈的跡象，已經升回94的重要支持位以上，昨日收94.16。美元指數去年有5次觸及這個位置便反彈。他認為，為了「吹脹」全球經濟及股市呢個「泡沫」，聯儲局必需決定要創造一個美元的熊市或者讓美股爆破。各國央行以至聯儲局當然希望能夠壓低美元匯價，支持全球經濟，但由於企業盈利及經濟增長根本支撐唔到這個估值已經過高的美股市場。
國基會（IMF）近期又再度下調今年全球經濟增長由2.6%至2.4%；雖然日本已經狂印銀紙催局經濟，但IMF預期日本經濟增長今年只有0.5%，可以講增長係微乎其微。Michael Pento估計聯儲局如果唔能夠將美元指數壓低（他認為要由94推低至80呢個水準才會見到效益），股市只能夠向下調整25%啦。
我感覺呢一波由美國加息放緩和美元回落的美股大反彈，已接近走到尾段，美國減慢加息的利好大多已反映，有少少利好消息漸漸出清的感覺，故此美元難破位向下(除非聯儲局改口話今年全年都不會加息)，故美股短期在業績期仍似向上，但上升動力受到制約。
陸羽仁
回應(3) 我想回應
陸羽仁 BLOG 舊文
來源 source: http://blogcity.me