匯控回購好過做生意
2016年04月20日
買大開細、估跌變升，成為呢期股市嘅常態。周初開市港股碌低，好多人話要試兩萬一關口，但噚晚美股杜指衝破萬八點，令亞洲股市普遍回升，同時成為港股回升藉口。
多哈回合傾石油減產無料到，睇住油價要插低，但油市趁科威特石油罷工，紐約
期油周一反彈上接近40美元水平。能源股顯著造好，杜瓊斯能源指數升1.6%，美股乘勢破關，成為股市估佢唔到嘅現成例子。呢期股市興炒相反預期，一個原因係經過年初全球投資市場大震盪，投資者普遍增加防險能力，令個市波幅減少，加上各國政府加強咗幣策協調，增加咗政策的影響力，所以可以見到全球資產價格普遍由低位回升。美股係咁多市場最強的領袖市，故此美股可以上破萬八點關口，內地同香港股市係落後弱勢股，但都唔使探底，投資者見經濟差如果太快沽空，咁就會被大戶夾住。
分拆香港業務有得諗
恒指造好，今次竟然輪到呢排成日捱沽嘅匯控(005) 成為升市功臣。集團主席范智廉及行政總裁歐智華在非正式股東大會回應，匯控股價令人不滿，公佈後股價於倫敦時段即時反彈。匯控呢排股價實在係弱雞，恒指已升回兩萬一千點以上，但佢股價仲喺48元低位浮沉，唔怪得有小股東在大會質問管理層會否考慮回購股份，管理層要出口術講住先。范智廉話研究回購股份的可能性，並擬於周五舉行的周年大會爭取股東授權，又冧股東話該行過去5年派息均有上升，冀可維持漸進派息政策。不過跟住又轉口風兜一兜，話最終回購與否須視乎資本監管要求。
講真，香港人對大笨象真係情至義盡，供股支持，又提供最多盈利，但集團要瘦身香港仲要開刀，但佢對香港股東就真係無對外國股東招呼咁周到喇。匯控呢期嘅投資者路演，都係賣透過在本港擁有領導地位，擴大珠三角業務，唔怪得有人話不如匯控拆咗香港匯豐出嚟上市仲好啦。
匯控如果分拆香港業務固然好啦，如果唔係，佢家低過帳面值，真係大件夾抵食，但佢要回購股價，就要考慮有無足夠股東應付監管要求，中環茶友話，以匯控家咁嘅狀況，賣啲家當做少啲生意，慳番啲股本用嚟回購，等如投資番喺自己身上。咁做一大好處係唔使諗咁多點樣去搵銀，必然可以做得到，操作性夠高。賣產先唔講收番幾多錢，總之資產負債表細咗，就有資本可以回購股份，同時維持派息，可能仲好過周身郁搞咁多嘢，呢啲叫做精人食少多覺瞓。咁好嘅橋，唔知管理層收到無。
喺匯控領漲下，恒指升274點，高報21436點，國企指數升9244點，升153點，成交635億元。匯控升3.7%，收50.75元。
依波路老闆蝕錢賣盤
依波路(1856) 控股權易手。獲單一最大股東林偉華通知，同意向Sense Control International Limited悉數出售9975.5萬股依波路股份，涉及金額2.245億元，相當於每股作價2.251元，比上日收市價1.7元溢價32.4%。
睇番依波路上市唔夠兩年，去年已經轉虧為盈。佢上市掛牌後曾經炒過吓，賣股前市值約6億元，同市價差唔多，家大股東賣股唔夠35%，毋須全面收購，老闆就真係乾手淨腳，但因為唔知搞乜，所以昨日股價收1.92元，升13%，暫時上唔番老闆賣盤價，小股東自然心忐忑。由於佢家同資產值唔係差咁遠，小股東最好係訂個止蝕位繼續坐喺處，等新股東出乜嘢招。
依波路老闆蝕錢賣盤，你可以話係依正商業市場嘅波路，因為上市公司地位基本上已值6億，有錢袋點解唔袋？好似北海集團(701) 昨日話，佢正重新考慮分拆其製漆業務於港交所主板作獨立上市可能性，並已委任中國光大融資為建議上市唯一保薦人。消息公佈後七海即時彈升，家佢市值6億元，如果分拆油漆業務，漆漆吓唔知有乜前景，但至少嚟咗隻殼出嚟就已經同公司市值差唔多。只係要留意佢分拆未知成唔成事，就算成事都唔會係一頭半個月間嘅事，如果想投機，高追不如低吸穩陣啲。
陸羽仁
金融High Tea 舊文
來源 source: http://hdfin.stheadline.com