操盤手劄記：咖啡洗版 啡走有運行
美國4月CPI創3年新高，加上聯儲局鷹派話今年可能加息兩、三次，隔晚美股即刻腳軟。昨日港股承接跌勢，再加上北大人駕到而深港通無到，大市碌低292點或1.5%，收19826；沽空比率連續11日超過14%，破曬紀錄，淡友堅有決心。牛證重貨區19400
至19599有成2,325張期指，同時為淡友殺落去鋸牛扒提供誘因。
美國通脹上升，主要係原油價格上漲帶動。油價回升，亦反映風險胃納回升，利好股市；可惜原油唔係神油，只刺激到周初美股、港股彈一彈起就回軟。股市未回春，樓市又點？本港樓價由舊年9月高位至今回落13%，但跌勢其實喺今年3月已見喘定，4月更按月錄得1%升幅。呢啲時候，又有人問買樓好定買地產股好？不妨睇睇下列個案。近日佐敦道文華樓一個實用面積1,005平方呎嘅低層單位以830萬元易手，原業主1966年以7萬零653元一手買入，持貨50年，沽貨獲利近823萬元，物業期內升值116倍。又唔使O嘴住，睇埋長江一號先。
舊年3月10日，長江實業為其超過42年嘅上市歷史畫上句號。當日股價逆市升0.6元或0.4%，收153.1元。呢個係長和系世紀大重組嘅安排，就係將長實、和黃嘅地產及非地產業務分開，重新組建兩間新公司──長和（001）及長實地產（1113）。
長實1972年11月1日掛牌，招股價3元，公開發售1,050萬股，以總發行股數4,200萬股計，市值1.26億元。到舊年3月10日，以收市價153.1元計，市值3,546億元，比當年市值暴增2,813倍。買樓50年升116倍，買地產股42年升2,813倍！
維他奶要搵腦細幫
咪住，唔好以為我推介長地呀，地產股有息魔風險，長和系更有超人健康風險，超人上個星期就因腸胃炎缺席股東會，幾年前更傳過通波仔，雖然已作否認，但年紀越大風險越大。我近日嘅心水其實係維他奶（345），該公司繼上月推出「啡走」後，最近又推出「黑豆奶」，為打入年輕人市場，特登喺D-Mop劃出專區，免費任飲！
周末俾腦細和明蝠俠嘅《情深咖啡未曾飲》洗版，如果維他奶早一步搵腦細……邊有咁多如果吖！不過，咖啡風潮再起，啡走亦會受惠！其實黑豆奶更應搵腦細推廣，同佢嘅黑面係絕配！
言歸正傳，維他奶現金流強勁，收入持續上升，年年派息，中期、末期無甩拖。公司年結日係3月底，就快公佈年度業績，近日技術走勢轉好，現價15元，首站睇16元。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com