中環在線：雷霆寧跑樓梯不踩單車
嫌單車要操練「邊有時間？」
■雷霆（右）去年底同郭基煇（左）、郭炳聯一齊跑上ICC。 資料圖片
新鴻基地產（016）近年熱衷於舉辦或贊助本地運動項目，除每年一度喺九龍站ICC舉行跑樓梯大賽，舊年亦首度贊助香港單車節，新地高層自然要踴躍參與，負責賣樓嘅
新地副董事總經理雷霆好坦白咁講，二選一，佢一定揀跑樓梯，賽前唔使操練吖嘛。
雷霆指，公關大員每年都會邀請員工參與賽事，佢當然走唔甩，要佢揀，佢就寧願揀跑樓梯，衝上ICC100樓，都唔揀踩單車。佢嘅原因好簡單：「踩單車要練，邊度有時間呢？」
每朝早做運動
咁又係，新地一年咁多樓賣，雷霆仲要幫老闆管理其他事務，幾難抽身。佢老闆郭炳聯舊年為準備參賽，要去東湧、欣澳特訓呀。
不過62歲嘅雷霆都算弗，舊年跑樓梯，用咗29分鐘完成，比郭炳江兒子、新地董事郭基煇慢7分鐘，郭炳聯就要40分鐘完成。
雷霆謙稱，唔係跑得叻，只係識得留力，此乃跑樓梯嘅秘訣。而佢每朝早亦會做運動，例如做Gym，保持身心健康咁話。
講得興起，佢又爆料，叫大家咪以為大隻仔一定跑樓梯跑得快，佢見過唔少外資投行嘅大隻後生仔跑到喘曬氣。
如無意外，今年底新地再辦跑樓梯，佢都會積極備戰，其實除咗跑一餐，雷霆指，ICC係商業樓宇，跑完100層之前，有隔火層可以抖唞，其間又有唔少笑容可親嘅同事遞水遞香蕉，為跑手打氣，等大家順利完成賽事，過程都幾爽㗎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com