消費唔升
2016/05/27 09:23:09
網誌分類: 經濟
美股連升兩日之後，昨日回順，三大指數個別發展，杜指跌微23點，收報17828點；標普500指數平手離場，收2090點；納指受惠於蘋果反彈，收市升7點至4902點。
Well Capital Management 首席投資策
略師Jim Paulsen對短期內的後市睇得幾樂觀，他認為包括美國在內的全球經濟增長，正在復甦，對於通縮的憂慮正在減退。
Paulsen表示，美企盈利最差的季度已經過去，今年餘下的時間將會有些改善。市場目前認為聯儲局6月加息的機會係26%，如果聯儲局在6月或者7月加息，反而會令到市場認為係聯儲局對美國經濟投下信心的一票，認為美國經濟在未來幾年內都唔會出現衰退，利好股市。
Paulsen表示，標普500指數離去年5月創出的歷史2130點只差2%，短期內突破呢個高位，機會唔細，不過，他提醒投資者，市場目前仍然比較悲觀，仍有好多人認為美股將會走熊，隨著通脹及工資上升的速度加快，市場又會開始擔心聯儲局會加快加息的步代，將對美股帶來下行壓力。他預計標普500指數今年年底目標價為2050點，即係話，美股今年還會向上走一段，之後回吐，全年埋單計數，會原地踏步。
美股昨日回軟，除了獲利盤回吐之外，與紐約油價有關，油價昨日朝早突破每桶50美元之後，未能守得住，收市倒跌0.3%至49.33美元，導致能源股下跌。有分析指出，目前油價雖然較2月中的低位26美元左近有大幅反彈，但相對於2014年7月時的大約92美元，仍然相去好遠。
由於汽油佔了美國人日常開支很大部份，理論上油價下跌可以提高美國人消費能力。但睇到美國百貨公司近年的業績表現卻愈來愈差，相反Costco、Wal-Mart等折扣超市、Dollar General、Dollar Tree等一蚊雞店，亞馬遜的特大折扣平台等盈利卻不差，可以見到美國人已經唔願花錢於百貨公司買非必要的商品上，慳得就慳。那麼，汽油價格大跌所省出來的錢去了那裡呢？
CNBC人氣主持人Jim Cramer解釋，美國人的平均收入好大部份花在不斷上漲的租金及醫療保健方面。而呢個情況，從宏觀的經濟數字中不會反映出來，但正影響著以百萬計的美國人。Cramer指出雖然現時供樓比租房更便宜，但由於現時的情況就像經濟大衰退和金融海嘯時期一樣，銀行唔敢輕易放貸，一般人很難獲得銀行的貸款（其實香港的情況差唔多，買樓首期愈來愈高），年輕人根本借唔到錢買樓，只有和父母同住或者租房，令到租金飛升。
與此同時，美國政府於2013年底推出『可負擔健保法案』（Affordable Care Act），其中規定了所有美國人都要買健康保險，唔買的話，將罰年收入的2.5%罰款。此前，由於保險費太貴，好多美國人膽博膽，都唔買保險，依家唔買唔得。結果係美國家庭在租金及醫保方面的開支抵消了汽油方面的節省。另外，美國人的工資由於全球化、自動化及數據化的影響，近幾年都沒有太大增長。油價雖然下跌，但拉上補下，對美國人的消費能力沒有幫助。
結論係美國經濟改善，但美國人消費不升，靠出口去美國的國家如中國，都唔會太好景。
陸羽仁
回應(4) 我想回應
陸羽仁 BLOG 舊文
來源 source: http://blogcity.me