智取大市：騰訊外另一佳選
騰訊（700）因一個轉珠手遊升到爆廠？之前走勢已逐步轉強，遲早破頂，破頂後估計周初會乘強勢再衝一轉。
論走勢同交投，現騰訊同去年3至4月初期間升勢差唔多，當時正值大時代，周線圖喺3月15日當周破頂見142.6元後，4星期內升抵高位171元，額外升幅28元。如
出現相若情況，現價加28元升幅，就見199元，咁啱係重要心理關口。
上年港股大時代，騰訊能跟市升，而今年港股欠缺牛氣，小弟反而估佢升得仲勁。因去年4月港股大時代雞犬皆升，太多股票選擇，分薄咗騰訊資金流同升幅。相反，現升得起嘅大路強勢股，兩隻手加埋數得曬，同size嘅股嚟睇，除了騰訊別無他選，好股供應有限下，但有海量資金集中去衝，情況反而似2000年科網股熱潮裏面嘅科網股。
科通芯城（400）計劃用溢價嘅每股12.5元配售新股，最特別係，承配人3年後可要求大股東康敬偉以每股12.88元接番批貨，如果康敬偉冇能力接貨，就喺市場沽出股份，然後差價由康敬偉補償。條款睇得到康敬偉孤注一擲，有野心、有胃口令股價升至遠高過12.5元，呢轉適逢科網股夠強，幕後絕不會錯過炒高機會。
晉佳
http://www.facebook.com/advanceguy1
晉佳
智取大市 - 晉佳 舊文
來源 source: http://hk.apple.nextmedia.com