一周兩件：谷底銀證有優勢
■銀證在內地有356間證券營業部，廣東省就佔咗66家。 資料圖片
銀河證券（6881）潛喺一年底部，預測PB，已經係內券最平。而呢期個場再炒「深港通」，同A股納入MSCI，有消息面跟尾，銀證有得諗嚇。
銀河證券由上年5月份跟中港股市大插水，現價6.49元累積
跌咗54%，場內專業預估該行今、明兩年分別有0.87倍同0.8倍PB，比起上市以嚟平均1.36倍PB，平咗41%。
而行家廣發證券（1776）今、明兩年專業預估1.4倍同1.28倍PB、中信證券（6030）1.1倍同1倍、海通證券（6837）1倍同0.9倍，中州證券（1375）0.97倍同1.03倍，銀河證券PB值平霸。
中港股市上年上半年超級瘋牛，今年回歸正常，所以，同其他內券一樣，銀河證券今年成績單倒退，已經係預料之內。但咁睇，場內專業評估，銀河證券喺呢個殘價，今年都係得7.9倍預測PE，比起該行上市以嚟平均11倍PE，平咗近30%。
上邊的行家中，廣發證券今年預測12倍PE、中信證券同海通證券都係9.5倍PE，銀河證券係繼中州證券（預測6倍PE）之後，場內另一至平的選擇。再講，銀河證券喺內地擁有356間證券營業部，當中廣東省就佔咗66家。呢期場內再傳「深港通」就快會開波，而喺檢討時，兼會擴容加入小型股。諗到係，銀河證券有一定的地區優勢，加埋「深港通」若果真的擴容，便可以提高北水散戶的興趣，銀河證券一樣係有著數。
由今年4月份以嚟，就有七間大行報告，畀銀河證券平均目標價8.8元，銀河證券現價要升36%。保守少少，呢轉當短打銀河證券，博「深港通」出爐，只係追番上中信證券同海通證券今年預測9.5倍PE的水位，銀河證券都講緊要升20%去到7.8元。
錢雋
細價股專家
本欄逢周一、三刊出
錢雋
一周二件 - 錢雋 舊文
來源 source: http://hk.apple.nextmedia.com