A股夏日吹寒風
2016年05月10日
在一堆壞消息下，內地股市又插，上證指數下試2800點水平，多個板塊都被人狂沽。喺A股浴血、股市夏日吹北風下，港股本來想趁外圍氣氛好啲反彈，結果都係先升後回，升得幾十點。內地經濟表現差，4月出口由升轉跌，按年下跌1.8%，進口按年下
跌10.9%，兩者都差過預期。唔靚嘅經濟數字影響開市氣氛，跟住阿爺仲整多一棍。
權威人士一講即跌
內地官方《人民日報》昨日在頭版又刊登權威人士專訪，題為《開局首季問大勢》，大家都估權威人士係最高領導，佢講得好白，首先否定第一季有小陽春，跟住重申中國經濟運行不可能是U形，更不可能是V形反彈，「今後幾年」是L形走勢，大家記住講緊幾年。權威人士又話，沒必要用放水加槓桿的辦法硬推經濟增長，亦不能靠谷股市樓市救經濟。權威人士好似用一盆冰水咁淋落股市上。
權威人士講經濟加埋今次共講過三次，去年5月和今年1月都跌，今次都唔例外，大家睇完報紙，A股昨日開市即插，上證綜合指數跌至近兩個月低位，滬指一度跌幅超3%。上證指數收報2832點，跌81點，接近2.8%，兩個交易日累跌逾5%；深證成指報9790點，跌310點；創業板指報2053點，跌75點，跌幅有成3.6%。
另外中國證監會確認對中概股回歸A股進行深入分析研究，多隻具借殼概念的殼資源股重挫，部份更加跌停板。內地嘅市場震盪直接輻射嚟香港，最明顯係內地黑色金屬期貨價格跌幅顯著，當中包括螺紋鋼、熱卷、鐵礦石、錳矽、矽鐵等全線瀉逾5%，另外焦炭插近7%，而焦煤挫4.3%，鋼鐵及煤炭A股大跌，馬鋼挫逾6%，寶鋼跌4%，兗州煤業A股跌停板。由於黑色金屬期貨暴挫，拖累多隻金屬H股都捱沽，鞍鋼(347) 瀉6%，報3.2元；馬鋼(323) 跌3.7%，造1.57元；重鋼(1053) 挫4%，造1.14元。另外煤炭股全線走低，兗煤(1171) 一插就插近4%，造4.09元。
今次震盪其中一個震央係中國大連商品交易所表示，對日內及非日內交易手續費，實行差異化收取措施，壓抑過於頻繁的短線交易，防範過度投機風險，同時避免對正常的非日內交易造成衝擊，確保市場運行效率，保障期貨市場價格發現及發揮避險功能，消息觸發內地金屬期貨急挫。
熟悉內地金股同金融市場嘅炒家話，其實內地期貨炒賣火熱，早排扯走大量資金，隨後當局已開始收緊槓桿，期貨市場已開始轉勢。佢反而最關注係內地而家又話限A股借殼。佢估計係中央擔心炒風太盛，影響咗市場資金供應，令股市失血，但係無咗炒殼概念下，又被理解成壞消息，個市再度插低。佢坦言香港家因為內地調資來港唔易，港股缺水好難炒起，本來大家想返內地炒作，突然被政府窒住，所以喺內地想靠鑊鏟搵食都唔係咁易。
金融難玩 資金或轉炒樓
呢個炒家話，內地其實唔缺錢，但金融炒作好多時政策風險太大，搞到投資者無所適從，唔排資金可能又會回流樓市，炒作一番，如果佢講得無錯，五六月如果個市跌得低殘，或者內房股會有啲機會炒吓。由於內地市況咁樣，昨日恒指雖然收報20156點，叫做升咗46點；但國企指數倒跌，收報8450點，挫20點或0.25%，國企指數已連跌六日，成交546億元。藍籌股最弱係利豐(494) ，集團一位長期客戶Aeropostale，申請破產保護，搞到利豐逆市收造4.41元，跌1.12%，是表現最曳藍籌，由於貿易生意難做，現階段仍然唔建議考慮呢隻股份。
國企指數咁弱，除咗金屬同煤炭股外，好多板塊都弱，好似A股大瀉，內地證券股捱沽。此外，水泥股亦遭拋售。安徽海螺(914) 挫3.5%，造18.12元；中國建材(3323) 跌2.7%，造3.57元，兩者包辦國指最曳的成份股首兩位。
陸羽仁
金融High Tea 舊文
來源 source: http://hdfin.stheadline.com