Money Walker：
中國南韓共通點
家陣嘅大陸同亞洲金融風暴前嘅南韓同泰國有乜共通點？
答案係都存在同一項會觸發金融危機嘅風險，講緊嘅係信貸增速快過M2（廣義貨幣供應量）增速。
簡單講，M2增速理應同信貸增速一致，即係銀行借幾多錢出去，貨幣供應就會增加幾多。
不過德銀發現，內地信貸增速快過M2增速嘅情況越趨嚴重，原因係人行放寬幣策後，借貸雖然多咗，但部份資金並冇變成M2。
人行放寬幣策後，借貸成本平咗，理論上會有更多人從銀行借錢，並投資喺經濟活動上，繼而促進經濟增長，而呢啲借貸亦會成為M2嘅一部份。但現實又邊有咁理想，德銀話人行加大放水後，內地的確多咗人從銀行借錢，不過部份人借完錢後，並冇拎啲錢去實體經濟投資，而係用嚟進行金融投資，好似係投資企業債，造成上述現象。
畢竟喺大陸，炒嘢好賺過搞生意，亦因此銀行借出嘅部份資金，會被用作投資企業債或其他金融資產，資金於是重新返回銀行體系，繼而催生泡沫。結果係幣策對於刺激經濟嘅效用降低之餘，更為下一波危機埋下伏線。德銀就提醒，外界對於內地金融體系嘅憂慮，一直只集中於不良貸款上，忽視咗上述信貸增長快過M2會造成泡沫嘅風險。
大陸正處於兩難困局，資金氾濫搵嘢炒，債券、內房、螺紋鋼輪流癲升，撳完一樣就到另一樣升，收水無疑可以一勞永逸，但此時收水唔止會引起市場恐慌，亦會推高債市融資成本，不利地方債置換。夾喺泡沫滋生同地方債爆煲之中，大陸一子錯隨時滿盤皆落索。
El.
本欄逢周二、五刊出
http://facebook.com/moneywalkerhk/
El.
Money Walker - El. 舊文
來源 source: http://hk.apple.nextmedia.com