睇實呢隻鷹
2016年05月20日
美股前晚坐過山車，皆因聯儲局公開市場委會昨日公開4月底的議息會議記錄，顯示大部份與會官員認為若第二季經濟數據持續與經濟復甦步伐配合，勞動市場轉強，通脹向2%目前邁進的話，則6月加息係合理做法。
深港通未有聲氣
消息傳出即時令美股由升轉向微跌
收市。港股上個月炒上兩萬一，主要都係炒聯儲局放鴿，若然儲局鴿轉鷹，咁就真係要小心啲嘞。
美國實體經濟陰晴不定，好多人覺得增長唔係表面睇咁好，故此估計6月加息機會好細。不過如果大家記性好的話，應該記得之前陸羽仁引述過一位財金猛人分析，覺得美息向上機會比普遍人所諗嘅大，主要係因為美國失業率跌到好低，工資開始有上升壓力，形成通脹威脅。若然失業率再低跌，就算經濟唔係咁勁，聯儲局可能都被迫加息，份議息記錄似乎正反映咗呢個想法，6月美國議息前真係要睇實呢隻鷹，慎防市況再度陷入利率焦慮期。
聯儲局放鷹，港匯應聲走軟，恒生指數失守19700點收市，收報19694點，下跌132點；國企指數收報8243點，下滑57點，成交金額556億元。係加息陰影下，惟獨銀行股因為咁樣有助推動利息收入增加，令匯控(005) 威番次，升3.2%，為表現最醒藍籌股；渣打(2888) 更升4.67%。
人大委員長張德江來港，成為周初股市反彈理由，當時說法之一是希望領導人有禮送，包括深港通會有好消息。不過，張德江呢次來港似乎偏向政治性居多，未有談及深港通進度。有中環茶友做事後孔明，話一早對呢樣嘢期望不大，因為領導人現時嚟香港唔興送禮，張德江到港前已放出消息，預期唔會有大禮送；再者係張德江主管人大，並唔係主管經濟；仲有一樣就係股市對政策好敏感，特別係權威人士大談L形增長，間接否定靠放水造泡救經濟，所以就算領導人都未必會隨便搞乜股市政策。
萬達私有化陰晴不定
A股政策呢排陰晴不定，好似限制借殼就令到好多計劃回歸的公司陷入不明朗狀態。市場注視緊萬達(3699) 私有化單嘢，究竟會點埋尾。萬達因為想返A股上市，提出私有化香港掛牌的股份，但消息公佈後，就傳出中央嚴查中國調資來港，萬達要攞錢來香港私有化公司就變成難題，所以傳出佢要在香港出高息集資。跟住另一個消息係中國限制A股借殼。呢個說法傳出後，外界好擔心萬達私有化會擱置，不過有報道就引述消息人士話，計劃會繼續進行，仲傳今個星期會公佈作價。呢個星期差不多過去，市場仲等緊有乜消息。
有銀行界人士話，自從去年人民幣匯價轉向後，令到好多中資企業想法變咗，以前會覺得嚟香港融資方便又便宜，但人仔一貶，大家覺得借美元外匯風險好大；加上中國開始減息，返去借錢好過香港借。如果能夠返埋A股掛牌，咁真係無乜需要在香港上市，萬達私有化基本上就係呢個諗法，但如果中央唔准調錢嚟香港融資，私有化要係香港搵錢，同時返中國借殼又唔知搞唔搞得掂，咁個算盤就唔知打唔打得響。從小股東角度，梗係希望私有化大計唔好變卦，因為佢股價由38元炒到停牌前約51元。若然計劃告吹，股價肯定唔見一截，呢個亦係我一直建議有機會食胡，唔食晒都要食一半嘅理由。
陸羽仁
金融High Tea 舊文
來源 source: http://hdfin.stheadline.com