新官發火 渣打腳軟
2016年06月15日
英國脫歐公投玩玩吓玩到真嘅一樣，英國《衛報》最新民意調查，贊成留歐是47%，脫歐是53%，脫歐暫時領先6個百分點，當然令人見到都腳軟。有人話最近歐國盃開鑼，若然過程有甚麼閃失，觸動英國人神經，咁脫歐就會弄假成真，金融市場亦會隨
住呢啲消息波動。
英國首相卡梅倫鍾意玩公投，繼蘇格蘭獨立公投後，脫歐又係另一鉅製，因為公投一鋪賭勝，就可以令對家在自己呢期任內收口。臨近月尾投票時間，脫歐呼聲響起，唔知呢個係唔係卡梅倫的哀兵策略，打其告急牌嘞。
日本財務大臣麻生太郎對日圓再次上漲發出警告，指出英國下周舉行脫歐公投可能對全球金融市場有影響，日本政府會對留意公投進展。如果外匯市場投機風氣仍旺盛，日本政府將作出回應，有意拋售日圓干預。德國財政部官員就對媒體預告，如果英國下周公投決定退出歐盟，市場將面臨大幅波動，德國會有對策，幾個工業國講到煞有介事，甚有幫口製造大叫「狼來了」的味道，亦令市場氣氛緊張起來。本來，市場已經估計美國喺公投前唔會加息，家脫歐威脅講到好似殺到埋身，令6月份美國聯儲局加息機會跌到好低。
撞着脫歐掩蓋聲浪
英國係咪留喺歐洲，對喺當地做生意嘅公司都有重大影響。有人估計一旦脫歐，英鎊會插穿10港元，有大行估匯控(005) 盈利會受影響，加上鎊匯貶值，會令大笨象減少三分之一派息，喺呢個風險下，英國業務比重較高的匯控、渣打(2888) 股價都受壓，匯控昨日跌1.4%，渣打跌2.6%。
不過，有退休銀行家同陸羽仁講，匯控同渣打雖然都喺脫歐陰影下受壓，但大家要留意渣打嘅情況，因為佢下跌可能唔止同大環境有關，同時涉及新行政總裁的言論。早兩日，外電引述做咗渣打行政總裁無耐的溫拓思話，留意到有員工為謀取個人利益，藐視公司守則，部份員工亦未有完成合規培訓，佢對呢啲情況十分失望及憤怒。
溫拓思在向員工發出的內部通告中，嚴斥不良分子將自己「凌駕法律之上」，重申該集團對此「零容忍」，仲話已革除違規人士職務。退休銀行家話，呢個表態反映佢同前朝割蓆，而且會陸續有清洗行動，所以短期會繼續有震盪，咁啱新官發火呢個消息流出，同脫歐民調差不多時間出籠，聲浪有多少被掩蓋，細心睇渣打股價係比匯控跌得多好多。到咗昨日匯控曾經反彈，渣打則全日捱沽，回調2.6%，收報55.2元，可見公司管治情況引起的憂慮，仲未完全過去。
壹傳媒網業盈利倒退
內地A股會否納入MSCI指數即將揭盅，新鴻基金融財富管理策略師溫傑估計，A股雖然未滿足所有條件，但過去台灣及南韓都有相似經驗，所以MSCI納入A股的機會逾60%。喺入摩前夕加埋脫歐公投陰影，大市交投續低，恒指收報20387點，下跌125點；國企指數收報8583點，下滑36點；成交金額532億元。
全球經濟不明朗，但無礙科網公司連橫合縱的大動作，微軟宣佈以262億美元收購企業社交媒體LinkedIn，作價比之前facebook收購WhatsApp更高。LinkedIn被視為商界的facebook，家有4.3億人用佢，用呢個數推論，即係每個用家大約值60美元，大家都話LinkedIn賣價估值超高，但睇番每個客的60美元作價又唔算高喎，問題係嫁入微軟之家後，有何方法在客戶身上搵番呢筆投資。
跨國網絡公司值錢，不過競爭亦好激烈同殘酷，好似近年大力開拓網媒嘅壹傳媒(282) ，傳統生意固然蝕錢，剛公佈嘅全年業績，互聯網廣告收入、互聯網訂閱、內容供應及開發手機遊戲及應用程式收入則只升1.8%至6.59億元，該業務盈利為3516萬元，亦跌6%。公司解釋係新遊戲遲咗推出，但同時令人擔心佢嘅網媒生意喺跨國巨企力逼下，增長是否接近飽和。
陸羽仁
金融High Tea 舊文
來源 source: http://hdfin.stheadline.com