阿爺加油
2016年06月22日
臨近脫歐公投，全球市場早已偷步炒留歐，外圍股市攀升後，港股昨日再有進帳，要留意係脫歐敏感股升幅已經唔大，顯示留歐概念已炒得差不多，市場反而係轉番炒美國無力加息，游資流番入商品股。
六絕月份過咗一半，股市月初插完一輪，呢排持續反彈，如果英國唔脫歐，
市場少咗不明朗因素，大市係兩萬點應該頂得住。
6月份股市有多項不明朗因素，包括A股入摩、美國加唔加息，以及脫歐公投，呢啲因素逐個明朗化。幾個因素中，真正有小小買大開細感覺嘅係A股入摩。阿爺雖然好努力想達標，最後大摩都係唔肯開閘，不過，阿爺似乎都做咗準備。除咗先前傳出話叫停人民幣國際化，6月開始都淡化入摩憧憬。昨日，人行在年報中表示，允許符合條件的優質外國公司在境內發行股票，可考慮推出可轉換股票存托憑證(CDR)，進一步擴大證券市場開放程度，顯示財金部門仲係不斷做嘢。
中國想發預託證券
按照人行講法，人仔係加入國基會特別提款權(SDR)之後，中國將按照既定目標，繼續堅持加強金融改革，擴大債券市場、股票市場等金融市場的對外開放程度，支持離岸人民幣市場健康發展，進一步提高人民幣可兌換、可自由使用程度，有序 實現人民幣資本項目可兌換。
存托憑證又稱存股證，是指在一國證券市場流通的外國公司有價證券的可轉讓憑證。我哋最熟的港股美國預託證(ADR)，就係港股在美國市場上市的預託證券。中國搞CDR，可能有大股有興趣，例如一直想打入中國的facebook，會唔會在中國未開網先上市？
從人行嘅部署睇，A股雖然未能入摩，人民幣走出去步伐或者唔走得太快，但吸收外資嘅努力係唔會停，如果呢啲招數能夠增加外資對中國資產嘅興趣，中長線對市場係好消息。
呢排市場嘅憂慮情緒稍為消散，大市繼續反彈，昨午後最多升171點，恒指收報20668點，升158點；國企指數收報8704點，漲64點，成交金額539億元。藍籌股大致造好。匯控(005) 微升0.91%，但始終未過50元嘅心理關口，收市報49.8元。淡馬錫減持建行(939) ，不過該股微升0.78%，收報5.2元。
三桶油有表現
呢排表現比較好嘅係石油股，周一紐約7月期油升2.9%，收報每桶49.37美元，推動石油股顯著造好。中海油(883) 升咗2.5%，收報9.59元；中石化(386) 升2%，收報5.43元；中石油(857) 漲0.57%，收報5.31元。
油價同石油股一樣，都係好低殘，美國唔加息住，金價炒作完，都有啲熱錢炒作吓石油股國家,;同一時間，中國似乎都係度買吓油，據海關總署資料顯示，5月原油進口總量3224萬噸，按年升39%；其中從俄羅斯進口原油達524萬噸，屢創紀錄新高。從沙特進口原油按年轉升34%至408萬噸。從伊朗進口原油按年轉升20%至263萬噸。銀紙唔值錢，阿爺咪掃番啲油，反正中國係能源消費國，趁平買啲唔會點嘥啫。通常某類股份大跌後唔會一口氣直上，所以見阿爺掃油想買石油股，最好係沽吓買吓，兼炒波幅。
陸羽仁
金融High Tea 舊文
來源 source: http://hdfin.stheadline.com