財經評論 2016年7月11日
財經評論：同一款尿片 卻相差6仙
■日本花王初生嬰兒尿片96片裝和90片裝有甚麼分別，原來是不少媽咪抱住的同一疑問。 陳家雄攝
替兩位心肝寶貝添置日用品，落樓下藥房入貨，驚見日本花王初生嬰兒尿片，每包賣97元，二話不說即買。抽住戰利品回家，和太太分享執平貨喜悅，「比上次同區另一間藥房，每包平3元！」
太太觀摩一下，疑惑地說：「90片嘅！」噢！我的天呀！不會買錯吧？比較包裝完全一樣，就連日文也沒有分別。計計數，新買的尿片，平均每片1.08元，家中存庫是另一間藥房上月購入，98元有96片，平均每片1.02元。今次每包平了1蚊，但少了6片，每片貴了6仙。以為好醒，原來是豬頭炳。
同樣是日本花王尿片，點解有6仙的差別？打開兩包尿片比較，細心看，一塊是星星暗花，另一塊泡泡印花，中間兔公仔，一個開口笑，一個微笑。斷估唔會泡泡暗花好吸啲啩！
睇返單據，之前買的96片裝是增量裝，平少少，好應該呀！然而，作為消費者，同一件貨，卻要買貴，總覺被搵了笨。心有不甘，上網問Google查下原因，原來不少媽咪抱住同一個疑問：「日本花王初生嬰兒尿片96片裝（NB96）和90片裝（NB90）有分別嗎？」有人話是大阪製和東京製，又有人話是正裝與試用裝。
其中一名網民Jin講得頭頭是道，指NB90是正包裝，NB96是加量裝，加量裝不是花王公司生產的，是委託其他公司生產。花王自家生產的正裝是內銷。
既然買貴，不如試下最實際。每片貴了6仙的NB90其實長啲，大脾U字位彈性好啲，唔似得NB96，U字位鎖得太緊，箍到BB大髀有條痕。吸濕力方面，比較唔到，因為每次份量唔會一樣。
同一件貨，兩種價錢，可以是零售商頂爛市的結果，也可以是生產商與貨品質量的分野。我傾向相信網民Jin，因為日本人總是把最好的留給國民，像日本最靚的米都是內銷，不似得中國人般無私奉獻，把最好的留給外人。就當這家藥房入日本優質水貨頂爛市吧！
翌日從媽媽谷聽到有人報料話大埔區某藥房NB90每包賣到120幾元。哈哈！以為自己買貴，點知有人買得仲貴。婆乸數微不足道，但執平貨永遠都是消費者的王道。
記者：陳家雄
財經評論 舊文
來源 source: http://hk.apple.nextmedia.com