金手指：領展應掃英跳樓貨
■英國脫歐人心惶惶，大批人賣嘢撤資，就係領展喺英國掃跳樓貨嘅時機了。 資料圖片
5月尾，孫柏文寫過一篇題為《林鄭查領展點炒》嘅文。我話如果領展（823）被林鄭司長同梁特搞，應該加快香港賣嘢速度。點知領展喺林梁夾擊之下，淆底話「暫擱置賣嘢」，好失望。
點都好，
領展之前賣過嘢，兼歷年來都買過嘢，買北京某商場時，佢哋管理層話：「領展應抄以前舊滙豐（005）營運模式。滙豐以前最勁嘅地方，係風平浪靜時乜都唔做，世界大亂時就去買跳樓貨。點解無端端買呢個北京場？唔係跳樓貨，市場就會覺得你哋唔醒，降低市盈率，同其他REITs睇齊時就大鑊。」
管理層說：「好兼有潛質物業唔係時時有，所以有就要買。」我答：「世界冇完美嘅資產，只有完美價錢。我又唔覺啲股民歧視你哋靠啲俾政府多年搞爛嘅商場、街市起家。有耐性，買嘢機會自然有。」
而今日，真係出現了！英國脫歐人心惶惶，大批人賣嘢撤資，首當其衝，就係佢哋商業物業嘅上市投資基金。而因贖回太勁，落閘放狗停贖回。我相信基金單位持有人同政府，都想快啲俾人贖回。
呢刻，就係領展嘅機會。用佢哋嘅購買力，趁機喺英國掃因周轉不靈嘅靚嘢跳樓貨，不但要賤價賣，仲要欠你人情。我相信領展只要講話會諗，市場即覺佢哋識買賤價嘢，延續神話托住市盈率外，連港府都會知呢個女神級港女係個有國際視野之人，到時打都唔敢出力了。
孫柏文
獨立股評人
http://fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com