盲追高息大股
2016年07月12日
美股挑戰新高，港股跟住回升316點，但同人唔同命，美股升係就業職位多經濟好，香港只係跟升，升勢並唔全面，主要都係靠業績比較穩陣嘅大股推升指數。
就業勁未改息口預期
美國雖然公佈新業數據強勁，但市場對美國加息機會仲係半信半疑。
昨日上升嘅股份好多都係同低息或貨幣供應增加有關，好似房託、公用股、金礦股等，地產股表現都唔錯。新地(016) 重上百元，收報100.1元，升2.5%；長地(1113) 收報50元，升1.5%。
瑞銀財富管理投資總監股票分析師霍慧敏話，亞太地區當中看好中國和印度市場，本港就好地產和電訊業，因有3%至4%的股息率，未來一至兩季會較受投資者歡迎，可見市場看好地產股，唔係看好樓市前景，而係貪佢息率唔錯；加上地產公司負債普遍偏低，有力維持派息。早兩日有地產代理為咗爭生意，上演街頭MMA打餐懵，呢個現象皆因當下代理做一手樓仲有生意，二手唔得，代理公司搵食艱難，有說當日打交者並非有牌代理，主要係代理公司壯聲勢的臨記，不過一樣擦出火花。
地產代理現時幾個人先開一張單，有人唔明點解仲咁多人做，估計係地產代理都好兩極化，有人開單難，有人仲搵到錢，好似代理高層講緊千萬年薪，自然吸引大家入行一博；再者做地產街霸開工時係好辛苦，但平時時間就比較自由。不過，香港樓市成熟，加上樓價企係高位好難大升，即係話成個餅增長有限，未來二手市場唔易有大量生意，從搵食角度，入行做代理都唔易啃。隻美聯(1200) 大市升佢跌0.5%，走勢好似落樓梯咁向下。
講番大市，恒指收報20880點，升316點；國企指數收報8703，升168點。由於升勢側埋利息敏感股，令到有唔少大股創出一年新高，強勢股王騰訊(700) 創上市新高，最高見180.8元，收報180元，升1.7%；度出條派特別息好橋的港鐵(066) ，最高見過40.45元，同創上市新高，收報40.4元，升2.3；另外創上市新高的還有香港電訊(6823) ，股價高見11.6元，升1.4%，收報11.56元，揚1.05%，不過佢雙頂味道幾濃，走勢弱過其他公用股。
睇嚟啲大錢都係覺得前景唔穩陣，美國雖然就業數據強勁，但仍未扭轉市場相信息口難以大升的預期。既然主權債務息率咁低都有人買，咁買股都買番啲派息穩定嘅股票。所謂有數得計，未必係話係佢一定有增長，而係佢業務比較保險，有數得計。呢類股份有得3、4厘息，咁就已經有大錢瞌埋眼買落去。雖然債息去到咁低，呢類收息股長遠嘅吸引力成疑，但由於大家睇得黑天鵝太多，風險胃納下降，高息股可能仲會炒多一陣。
金價上周五雖因美國就業數據一度急插後反彈，但金礦股氣勢續旺，紫金(2899) 擬發A股集資，全日升3.8%；招金(1818) 再升3.3%。二三線啲嘅恒興黃金(2303) 升8.7%；靈寶黃金(3330) 更升9.5%。
金礦股開始癲癲哋
呢排金礦股有景，好嘅公司股價一早創新高，跟住輪到二三線，現時連概念股都炒埋一份。好似有隻壇金礦業(621) 爆升39%，收市報0.132元。睇番佢截至2016年3月底止的全年業績，純利3.82億元；每股基本純利2.98仙；不派末期息.2015年同期則虧損1.1億元。唔好睇佢業績轉虧為盈，主要都係紙上富貴。佢在期內並無作任何實地勘探活動；換言之，相關數字主要都係帳面上的數據。再睇番過去10年，基本上公司都係有供股無派息，所以投機之前都要睇清楚。
陸羽仁
金融High Tea 舊文
來源 source: http://hdfin.stheadline.com