智取大市：十個字睇通大勢
■市場憧憬日央行出招放水，不過筆者認為日本會出口術居多。 資料圖片
八十後或再上一輩喺香港讀過中學，都逃不過要讀中文嘅26篇範文，總有幾句能夠記成世。其中《曹劌論戰》一句「一鼓作氣，再而衰，三而竭」，可活學活用到今時今日，都慶幸自己讀過嚇死書，咪睇少佢呢句，
可能係未來一年半載環球股市嘅重要啟示。
英國脫歐公投後，環球再有藉口加碼放水，美股破頂，各個主要市場都升，但正如本欄之前提及，港股熱炒板塊收到勁窄，除咗資產股、資源股，其他板塊大部份都升唔起，證明港股投資者認為水浸到點，對中港經濟、企業冇作用。唯獨日本股滙對放水還有反應。
全球放水，目前已去到「再而衰、接近三而竭」嘅地步，從呢一點推測，各國央行最唔想出現嘅畫面，就係全世界都睇死放水冇料到，所以喺「三而竭」之前，放水可能會講多過做，總之吊嚇你癮，費事大家太早發現放水放得太盡，加快失望。
今個星期四歐央行議息，市場預期維持利率不變，下星期日央行同美國聯儲局議息，美國唔加息就梗，不過，市場憧憬日央行出招，但小弟估計日本較大機會繼續出口術，而冇實招。股市方面，只要因為放水消息而觸發資金盲搶股，到時就要撤退。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com