深資掃貨 商廈值錢
2016年07月20日
全球股市炒作放水下累積升幅不少，開始出現唞氣現象，港股開市偏軟，全日變動不大。受英國脫歐影響，歐羅區ZEW經濟景氣指數由6月升20.2，轉至負14.7，歐洲股市普遍偏軟。喺呢啲市況下，資金改為炒吓個別嘢。
喺大市炒上今年高
位，投資者戒心增加，恒指周二低開68點，最低跌至21612點，下挫191點，午後在21700點附近徘徊。恒指收報21673點，跌129點；國企指數收報8988點，下挫102點，成交金額550億元。
會德豐又食大茶飯
港鐵(066) 觀塘線延線，預計將於今年第三或第四季通車，股價逆市偏好，更一度再創上市高位，高見42.25元，升0.7%。相反，國泰航空(293) 6月客貨運齊升，惟未能撐起股價造好，收造12.2元，跌2.87%，為包尾藍籌股，大市氣氛唔係咁差，佢又有好消息，但股價都乏力，好可能係有大基金唔睇好佢，逢高就沽貨，所以投資者都唔好貪平炒落後。
呢期深圳真係紅，佢樓盤好賣，企業又四出併購食大嘢。最近，又係打住深圳旗號嘅祥祺集團主席陳紅天，繼上月以個人名義以21億購入山頂獨立屋後，呎價破盡全球紀錄，最新再度出手鯨吞全幢甲級商廈，向會德豐(022) 購入紅磡甲廈One HarbourGate東座全幢，將作為集團香港總部，是次為陳紅天於短短兩個月內，合共動用66億元購入香港物業。
深圳祥祺集團呢次購入One HarbourGate，平均呎價高達約16000元，較去年底成交的西座，呎價8個月上升8%。陳紅天短短兩個月豪花66億元購入物業。其實陳紅天去年中已用咗3.9億元，向太古地產購入東半山傲璇(OPUS)一個單位，跟住動作愈嚟愈大。
會德豐近年除咗投住宅地外，仲好積極起商廈，然後成幢甩手，去年11月佢先將One HarbourGate西座以58.5億元，售予中國人壽海外後，發展商已着手部署出售東座全幢，經過各財團多月的爭奪戰後，One HarbourGate東座最終賣咗畀深圳財團，作為集團於本港的總部及長線投資組合之一。
食完大茶飯，會德豐地產主席梁志堅梗係開心啦，堅叔話，賣完呢兩座商廈，集團會加快觀塘前九倉電訊廣場的重建工程，該項目現正進行地基工程，並將興建成東九臨海甲廈，以應付市場需求，言下之意又準備造牌食胡啦。當然，股東最關心係派息會唔會有多少着數啦。
華置食完一餐又等下餐
家內地財團來港買嘢唔手軟，並無因為內地經濟放緩或人仔貶值窒步。華人置業(127) 啱啱就發盈喜兼預告派特別息每股2.1元，而且下個月就有錢收，股價隨之急升17%，收報21.5元。
華人置業中期業績咁靚仔，主要由於期內出售持有的灣仔商廈畀恒大(3333) 、買賣物業銷售增加、以及出售上海愛美高大廈等因素。有心水清嘅茶友話，華置賣灣仔商廈，跟住仲賣咗皇室堡，當時曾透露若交易完成，會考慮再派息，家未食呢餐佢就已經睇下一餐。
中環、灣仔一帶全幢商廈有限，九龍東嘅新商業區開始成為中資新寵，唔少公司喺區內有物業，如果肯賣，隨時就袋番大筆水落袋。
陸羽仁
金融High Tea 舊文
來源 source: http://hdfin.stheadline.com