財女手筆：睇樓客湧至 嚇親業主
■藍籌屋苑沙田第一城樓價日前反彈兩成。 資料圖片
樓市反彈，加上新樓銷情理想，營造樓市暢旺的氣氛，市民又陷入驚恐樓價再飆升、買樓無期，有屋苑吸引大批恐慌市民四出睇樓。
新界東一向以用家為主，藍籌屋苑沙田第一城樓價日前反彈兩成，細戶癲賣420萬元
，昨日就有經紀分享奇聞！話說沙田區有一個兩房二手樓噚日一放盤，樓價反彈市民心驚，睇樓客見到有樓，就好似玩緊《Pokémon Go》忽然發現比卡超咁，瘋狂湧上去，一個下午已經有六組客約晚上即刻睇樓！
該樓盤較偏遠，呎價一向低於市區，約1萬蚊左右，業主原本覺得自己搵客困難。不過，經歷一晚就脫胎換骨！第一組客睇樓，無問題，業主好好招呼，全屋任睇；第二批客變為一般招呼；第三批客唔畀睇房；第四、五、六批客，連樓都無得睇！
業主放盤，當然吊高嚟賣，暗底都有議價空間，忽然被睇樓人潮嚇親，自己間屋原來咁搶手，即時封盤，話要諗清楚到底賣幾多錢！
英國脫歐玩一玩，美國就算11月總統大選後加息，加息仍然係最大阻力，呢種反口唔賣樓無問題，因為好快又會再推過，高位唔放待何時？買樓嘅量力而為。
Melody
http://www.facebook.com/whichroad
本欄逢周三刊出
Melody
財女手筆 - Melody 舊文
來源 source: http://hk.apple.nextmedia.com