中環在線：
王思聰「碎銀」投資飲食概念
■富二代王思聰（左）經常被影到夜蒲豪使。 
飲食股越來越多，新近又有一隻飲食概念（8056）準備喺創業板上市，佢旗下有「地獄廚神」Gordon Ramsay嘅Bread Street Ki
tchen與London House，仲有BLT，股東包括萬達太子爺王思聰，獨立非執董有路勁基建（1098）太子爺單頌曦，名氣貴氣齊曬。
28歲嘅王思聰係內地富豪王健林獨子，經常有關於佢夜蒲豪使嘅消息，有傳佢夜蒲一晚花一百幾十萬，所以呢，佢投資3,112萬元落飲食概念，應該只屬碎銀，公司上市後，佢持股約一成。
至於擔任公司獨董嘅單頌曦就係低調富二代，今年41歲，會計出身，𠵱家係路勁副營運總監，唔知佢係咪好鍾意睇Gordon Ramsay做節目爆粗，又成日幫襯飲食概念旗下23間中高檔餐廳，所以做埋獨董嘞。
呢間公司又真夠坦白喎，喺招股書「風險因素」一欄寫明，過去兩年盈利下跌，叫股民望清楚，佢哋前年盈利已經跌咗41%，舊年再跌22%，賺1,812萬元。
數字表明，家陣經濟環境轉差，中高檔餐廳嘅經營狀況值得留意，就算收入不變，成本上升就要諗計。唔少公司希望趕喺最壞情況出現之前上市，集資一筆，可以繼續支持公司發展喇。
不過普通股民暫時唔使諗，因為隻股以全配售形式上市，招股價0.4至0.6元，集資最多1.2億元，掛牌後睇定啲先諗喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com