智取大市：誠哥派錢的悲歌
■李嘉誠派錢，某程度上等如有個最頂級嘅醫生同你講「你冇得醫」一樣。 資料圖片
誠哥作為香港最成功嘅商人，賺錢一定佢最叻，佢亦好清楚乜嘢能夠賺錢，乜嘢會蝕錢，甚至明明蝕嘅，過一過佢手，好快變賺。
誠哥派錢，冇乜值得高興，等如一個最頂級嘅醫生，話畀你聽冇得醫一樣
。如果佢拎錢出嚟起學校，呢啲叫做投資教育，等後生仔第時幫佢打工醒少少，齋捐？係連最低層次嘅投資都不如，倒不如total loss捐出嚟算數。佢捐畀香港後生仔，等於閣下捐去助養非洲貧窮國家兒童，正正因為覺得非洲貧窮國家兒童冇回報、冇希望，感覺上會抵捐，如果你覺得非洲貧窮國家兒童有一朝會發達，你點會益佢？
李嘉誠嘅維港投資，不停喺以色列投資。用數據答你，以色列高科技研發開支佔GDP成4%，香港得0.7%，香港所謂高科技或許係寫個App咁大把。不能怪曬香港人，政府冇支援，企業冇理由掟錢出嚟同你做炮灰，久而久之，香港就同科技、甚至同前景絕緣。
呢5,000蚊，睇落幾似畀後生仔食一餐斷頭餐。誠哥心諗，你拎住5,000蚊去課金捉比卡超，然後upgrade自己……個手機上網plan去無限上網，玩足一年，都算，派得畀你，但求大家高興，總好過投資完又要蝕錢咁激氣。
晉佳
http://fb.com/advanceguy1
晉佳
智取大市 - 晉佳 舊文
來源 source: http://hk.apple.nextmedia.com