中環在線：
陳啟宗低調乖仔升助理董事
■Adriel加入家族企業近6年，上月終於升做助理董事。
恒隆地產（101）主席陳啟宗嘅乖仔陳文博（Adriel）升職！Adriel加入家族企業5、6年，最初只係做行政助理，之後升為高級經理，上個月升咗做助理董事。恭喜曬，幾時請食飯先？
34歲
嘅Adriel算係低調富三代，可能爸爸陳啟宗夠曬高調，反而想乖仔專心工作，唔好公開講咁多，就算公司業績會、股東會都好少見到佢。咁都啱嘅，陳啟宗只係67歲，十分精靈，有排未退休，阿仔畀心機學嘢先喇，有排未接班。不過家陣恒隆公司網站嘅主要管理層一欄，終於見到佢個嘜頭，佢亦係最後生嘅助董。
Adriel過去幾年主要跟住董事總經理陳南祿學嘢，就算升咗職，佢亦會跟陳南祿保持師徒關係。以前Adriel主要負責租務、物業管理同項目發展，升職後工作量自然增加，未來要睇埋買地、建築工程等等，即係乜都關佢事喇。
話時話，表面睇陳啟宗喺訓練阿仔呢方面都算係咁，講到明冇太子爺特權，Adriel初入職做行政助理要跟足公司規矩，搭飛機冇得坐商務客位，等到升做經理級先可以坐。佢亦好慳家，曾自爆身上西裝只係幾百蚊人仔貨色，唔理真定假，起碼做足公關工夫。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com