萬科禮遇華潤有運行
2016年07月29日
美國聯邦儲備局會議決定維持利率不變，由於聯儲局會後聲明雖然講經濟好轉，但對息口走勢無好明顯取態，股市反應溫和，美股接近平收，港股都上落唔大。昨日期指結算日走勢較平靜，後市仲會睇住嚟炒吓。
美股續炒 須防變息
我喺網誌形容，聯儲
局聲明唔鷹唔鴿，屬於中性，聲明形容「美國勞動市場在5月疲弱過後，在6月已經轉強(指非農業就業職位增長由5月的1.1萬個大增至6月的28.7萬個)。」同時亦講到經濟不理想的一面，話「預期通脹近期仍會維持在低位」，而未來隨着能源價格回落的趨勢逆轉，勞工市場持續強化，通脹就會回升。
我話聲明屬於中性，因為裏面講嘅嘢同市場睇法同預期差唔多，無乜意外，對市場沒有加添新因素。但值得留意多啲嘅係，聲明話「經濟的短期風險減退」，咁即係話脫歐嘅衝擊開始減退。本來市場預期美國等到6月英國公投無事後，7月會加息，點知後來公投出現意外結果，美國決定維持利率不變觀望情況，家聯儲局話短期風險減退，即係話如果情況維持，咁利率情況應該重回舊軌啦。聯儲局今次無話明幾時加息，美股短期可能仲會炒吓，要防備一旦利率前景有變化跡象時，美股就急回。
喺脫歐公投前，美國利率狀況係短期想加、長期加幅有限嘅格局，但出了英國脫歐一隻黑天鵝後，大家預期唔同咗，認為各國會合力放水，結果令美債同美股升到歷史新高。但如今話好似無事一切如舊，唯一唔同就係股債價格貴咗好多囉。從呢個角度去睇港股，本來恒生指數上半年喺19000點同20000點打咗個幾實嘅底，呢個月開始出現反彈都合理，彈完之後，有可能又回到上落市格局，等候內地同外圍經濟變化。
美國議息完畢，港股喺三連升後有回吐壓力，大市在內地3點收市後一度急跌160點，但跟手又V形彈番上去，恒指收報22174點，跌44點；國企指數收報9082點，下滑32點；成交629億元。
大股中最矚目係萬科企業(2202) 大幅飆升11.5%，收報17.8元，《21世紀經濟報導》爆料，話萬科董事長王石日前去香港華潤總部拜訪，華潤呢個主要股東對萬科收購戰起關鍵作用，王石過去一向自行其事，唔理華潤，今次明顯向華潤示好，去完仲有人放料出街，令人猜想結果係咪以和為貴。之前由於市場擔心萬科股東內鬥不明朗，股價急插，如今就趁住消息急彈。
我就話萬科咁多個股東中，華潤最似樣，佢自己旗下的華潤置地(1109) 管理得像模像樣。王石過去我行我素唔多妥，加強向股東交代，讓華潤有更大參與角色，對改善萬科的公司管治有好處，唔好搞到好似家族私人公司咁，加強問責，股價前景都會好啲。王石過去引入其他股東排斥華潤，明顯行錯咗路。
股仔賣殼似再活躍
呢排公司賣盤好似又活躍咗，先達國際物流(6123) 公佈，獲控股股東兼集團主席林進展通知，與一名潛在買方就可能買賣先達國際物流66.7%股權訂立諒解備忘錄，若交易落實可能導致公司控制權出現變動，成事就會提出全面收購。受賣盤消息沖喜，股價最高見過1.83元，收造1.76元，大升23%。公司喺宣佈賣盤前市值6億幾，同殼價差唔多，呢類交易或者又會刺激股民喺啲幾億市值嘅半新股間尋吓寶。
先達物流主要係向航空公司取得貨運艙位，為客戶提供出口貨運代理服務，透過託運貨物拼箱，從特定貨運艙位賺取利潤，呢門生意可以做到上市已經唔容易。家上市啱啱滿咗2年，上市後公司純利倒退，但就未算變晒樣。股價今年最低去過0.82元，市值得番3億幾，公司喺低位曾經回購，家搵主好人家賣盤，股東如果有機會執多少離場，大股東都算係咁啦。
陸羽仁
金融High Tea 舊文
來源 source: http://hdfin.stheadline.com