中環在線：匯豐搵細價股王出山
環球經濟轉差，金融機構裁員不斷，匯豐上月透露，2017年前會於全球裁員近二萬五千人，但管理層講明香港員工數目唔會減少，無他嘅，只要幫到公司賺錢，又點捨得炒你。高層雖然話員工數目唔變，但自己都要醒目，諗多啲計幫公司。
華華近日收到線報，匯豐想加強佢哋喺零售
銀行及財富管理部門人氣，決定叫「細價股王」劉紹文（Kenny Lau）出山做代言人，由匯豐金融嘅環球證券資本市場及香港證券主管，轉任匯豐金融嘅投資策略主管。
主打中短期投資策略
不過線人話，匯豐要維持自己大行風格，所以Kenny唔會好似財演咁畀冧巴，而係主打中短期貼市投資策略。好似英國脫歐全球股市大跌，Kenny可能會叫你將資金由股市轉投黃金避嚇險咁。華華打畀Kenny，佢只係話「多謝關心，遲啲先同大家見面」。
做咗廿年分析員嘅Kenny喺行內有「細價股王」之稱，皆因過去專門研究中小型股份嘅投資價值，善於低位撈底同發掘未被人發現嘅優質細價股，2008年至2014年間，持續贏得「機構投資者雜誌」券商分析員前三甲。
佢效力里昂證券時，每年都會以「風水大師」嘅造型推介里昂風水指數，唔知會唔會又整個匯豐風水指數？
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com