財經評論：愛撈底之羊群心理
■香港未來三至四年有多達9萬夥一手樓供應。 資料圖片
樓價突然轉向，匪夷所思。今年初樓市一沉百踩，不少樓市專家斷定樓價跌兩、三成肯定冇走雞。勢估不到，就算經濟唱到幾差，銅鑼灣通街吉舖，深井豪景花園貨尾都沽清，樓市總打不死。
港人喜歡排隊，撈底的羊群心理造就樓價回升。港
人仍很有錢，只等跌市，當掃曬平貨後，再等下次跌浪。經濟差，樓市不一定差，聽落荒謬。事實上，二手樓反彈，新盤貨尾清袋，為樓市反彈訊號。做地產版記者，走在樓市最前線，每日問地產代理成交是例行公事。成交多與少，最能感受樓市氣氛。
但近日所感受的，是二手樓旺不夠一個月，成交又再拍「拍烏蠅」。近兩日打去問，地產經紀的答案都是「冇呀冇呀今日，靜到死呀」。靜到死的原因，離離去去又是同一個無法解決的問題，政府一日不撤回樓市辣招（SSD），二手供應被鎖死。樓價回升，是急跌後的正常反應。每次樓市調整周期，升跌也好，中間總有波幅。畢竟樓價已調整大半年，總有趁低吸納的購買力。
除了傳媒，地產代理也開始唱好樓市。因此可預期二手樓價會出現乾升，但不要期望大反彈。除了政府擺明要樓價跌，地產商是小業主最大敵人。未來三至四年多達9萬夥一手樓供應。近期新盤進入促銷狀態，挾大量優惠及高按揭成數，已賣贏二手樓幾條街。二手業主唯一優勢就是息口低，有防守本錢。市場最關心樓價何時見底回升，既然樓市專家信不過，明明話跌兩、三成，但樓價跌一成已反彈。連專家都開始轉軚，今日的我打倒昨日的我，不如信自己。嘉湖山莊業主林太今年初一句「樓市專家食屎啦」，今日完全應景。
記者：朱連峰
財經評論 舊文
來源 source: http://hk.apple.nextmedia.com