中環在線 - 李華華 2016年8月29日
中環在線：
大劉少去福臨門 食唔慣新廚手勢？
灣仔福臨門近月少咗華置（127）大股東劉鑾雄（大劉）呢個生招牌，唔少熟客又話食物味道唔同咗，佢個廚房究竟發生乜事呢？原來除咗半島嘉麟樓挖走大廚Gordon Leung，年近70嘅總廚劉師傅今年5月退休後，幾乎成個廚房大換班。
「拳手廚師」回巢換班底
廚房大換班又唔一定係壞事，聞說福臨門近10年銳意培養新一批大廚，比較出名係有份創辦福臨門姊妹店國福樓、澳門福臨門嘅「拳手廚師」陳佑良（良哥），良哥今年中就調返去灣仔福臨門做行政總廚，成個廚房團隊唔同曬。
良哥未做廚師之前，做過兩年職業拳手，後來轉戰廚房，一做30幾年，大部份時間幫福臨門打工，「賭王」何鴻燊、新世界發展（017）主席鄭家純都搵過佢主理家宴，有段時間佢去咗純官旗下皇朝會做行政總廚，4年前國福樓開業，佢就回巢至今。
聽講呢，良哥今年中調返去灣仔福臨門坐鎮，冇幾耐已經知道唔少熟客有微言，指食物嘅味道唔同咗。
鬼咩，福臨門嘅熟客好多幫襯咗幾十年，以前班廚師記熟每位熟客嘅口味，甜啲、鹹啲一清二楚，分分鐘每個客對一碟梅菜蒸豬肉都有唔同要求，良哥確係要花啲時間摸清客人口味。
大劉可能食唔慣良哥嘅手勢，又想去其他地方，咁咪周圍去，嘉麟樓、置地China Tang都見到佢蹤影嘞。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com