一路一帶：「港獨」令上市觸礁
■從前，有一間專做網上銷售嘅平台公司想嚟香港上市。 資料圖片
從前，有一間專做網上銷售嘅平台公司想嚟香港上市，呢間公司叫做阿里巴巴與四十大盜，簡稱「阿四」，因為阿四將香港定為獨立……市場，夾硬加香港地區運費，因此被聯交所拒絕其香港上市申請。
過程是咁的：
上市科主管狄龍：「我覺得你嘅核心價值唔適合香港，你唔好嚟掛牌啦！」
阿四：「中國式邏輯咪即係香港邏輯，大家都是中國，不要分那麼細。」
狄龍：「咁你簽咗呢份確認書，證明你將來唔會起香港股民尾注啦。」
阿四：「我簽！我簽！我發誓唔會再將香港定為獨立……市場，運貨嚟香港唔使收附加費！」
狄龍：「我認為你呃人，你冇提供充份證據，證明香港唔會做獨立……市場，『我注意到』、『我從新聞媒體報道』、『我留意到及需考慮』，阿四你即使簽咗確認書，將來都係會當香港係獨立……市場，會繼續收香港消費者嘅附加運費，所以我正式拒絕你嘅香港上市申請！」
阿四：「你知唔知好多港女都去我旗下嘅『陶寶寶』鳩嗚呀？點解你一個小小嘅上市科職員可以決定一間公司生死？你有冇問過香港700萬人感受？有冇問過我背後13億人民嘅意願？香港股市冇咗我，係你哋損失！我要起科技資訊革命，我將來會將為世界第五大經濟體……我會返嚟搵你算賬！」
就因為狄龍一個人嘅睇法，認為阿四將來會繼續將香港定係獨立市場，就否決咗阿四嚟香港上市嘅申請，變相令阿四被「剝奪上市權利終身」。其實香港現在同中國已經冇乜分別，「50年不變」嘅決定只係生活方式保持不變，好快特區會成為直轄市，根本就唔會再收附加運費。狄龍透過一己之力阻止阿四入閘，其實仲野蠻過中國嘅貪官。中國嘅政治犯，都要經過法庭判決，先至剝奪其政治權利。
試想像嚇，當初Pokémon入面嘅博士，假如同小智講：「我認為你會虐待小精靈，我都係唔畀你做精靈訓練員，我唔會將皮卡丘……sorry，我唔會將比卡超交畀你！」冇咗小智，咁成個寵物小精靈都唔會有故事，Pokémon GO都唔會出現。
斯郎
https://www.facebook.com/oneroadonebelt/
本欄逢周四刊出
斯郎
~TITLE_S~一路一帶 - 斯郎 2016年8月4日 舊文
來源 source: http://hk.apple.nextmedia.com