財金冒險號：
政府放水近乎無效
■日本推28萬億日圓刺激方案後，日圓照升，說明政府放水將近無效。 資料圖片
英國公投脫歐已個幾月，本來係大大隻黑天鵝，點知全球股市係咁升，當脫歐無到。小生注意到MSCI世界指數由公投後低位反彈9%，恒指仲勁，最多反彈13%。靠乜嘢？無非炒央行印銀紙。
我從新聞媒體報道，得知歐洲央行、英倫銀行都未放水；聯儲局就話「短期風險減少」，耶倫的意思應是，年底前會加息一次；中共政治局會議話要「抑制資產泡沫」；暫時有做嘢嘅，只得澳洲央行同日本央行及內閣，但好諷刺，澳洲減息後澳元升，日本推28萬億日圓刺激方案後日圓又升。投資者實在需要考慮，政府泵水仲有冇用？
我認為，央行放水，只在市場恐慌時有用，例如銀行擠提，或2008年雷曼爆煲，金融系統幾乎停頓，央行就必須挺身而出，做lender of last resort。但當市場風平浪靜，仍隨便放水，只會毒癮越來越深，日漸麻木。日本就係活生生例子，1990年泡沫爆破後，平均一年一次財政刺激，頭十年都算有用，其後效用漸減，好明顯解決唔到經濟結構問題。
我不能信納，黔驢技窮的央行再減息、再加大QE，就可以谷起經濟、解決債務危機。就算資產價格短暫被谷起，終歸要還。我的最終結論是，環球政府放水將近無效，正如特區管治將近無效。
笑笑生
mailto:sneeringman@gmail.com
本欄逢周四刊出
笑笑生
財金冒險號 - 笑笑生 舊文
來源 source: http://hk.apple.nextmedia.com