財經評論：
打風買樓似失心瘋
■日前颱風襲港，即使天文台已預警會掛8號風球，仍有大批市民到新盤售樓處買樓。 資料圖片
俗話有雲：「打風先嚟買菜」，歇後語「一定貴」。打風令菜價上漲，菜價批發價抬高，小市民被迫捱貴菜，所以都會趁打風前，儲定糧餉，買定蔬菜迎接打風，避免菜販趁火打劫。
剛剛過了去的颱風
「妮妲」來勢洶洶，天文台一早預警會懸掛8號風球，甚至更高風球。不過，香港人打風，原來唔單止盲搶菜，而是去搶樓。
過去周一晚，天文台預警傍晚時分會掛8號波，人人放工趕返屋企，地產商卻一於樓照賣。
新地當晚開賣元朗新盤Park Yoho1B期及1C期合共88夥，結果風雨不改，即使天文台預早通知晚上8時40分會掛8號波，市民照舊6時多準時到達等揀樓。揀樓簽約之時，正正是打緊8號風球，印象中，是一手住宅銷售條例生效後，第一個樓盤在打8號風球都開賣新盤。
市場可將這情況演繹為發展商心急趕散貨，即使打風都懶理市民安全照賣樓。惟發展商又那麼有信心，認為打風都照賣到樓，不讓員工盡早收工之餘，又深信已入票準買家會到場揀樓；另一邊廂，政府不是唱著未來三、四年新樓供應邁向10萬夥嗎？這樣來看，供應只會越來越多，市民又何解趕住去買樓？外圍經濟局勢未穩，年底前又大量新盤可選擇，何解急著去揀樓？
結果，當晚銷情是賣約80夥，儘管未致一掃而空，但打8號風球都賣出九成單位，銷售比率比沒有打風更強勁。香港真是一個奇怪的地方，風雨下失心瘋的盲搶樓，恐怕都是怕「買貴菜」道理吧。
記者：湯家明
財經評論 舊文
來源 source: http://hk.apple.nextmedia.com