新中除牌益左新世界
2016年08月09日
美股股市上升，杜指又再衝擊新高，去到高位自然睇淡者增加。「商品大王」羅傑斯就撰文，形容現時與1920及1930年代的動盪歲月相似，英國脫歐正為這個時代揭開序幕，估計未來一兩年將發生一些事情，甚至可能比英國脫歐、恐怖襲擊、德銀近乎崩潰及德國長期
利率變成負數等更可怕。不過美股造好帶動港股再上，而且上升力度比想像中大，全日收市升左300幾點，差唔多接近高位收市，甚有你唔信佢就先夾你一劑。
羅傑斯在文中警告，英國脫歐將啟動全球動盪，同時亦是央行加快印鈔，帶動資產價格向上，當會睇起嚟表面風光，但股市內大部份股票已在下跌，經濟衰退已開始。他形容現時債務情況較2008年更嚴峻，預期泡沫最終爆破。佢仲預言，在英國脫歐後，法國很可能會是下一個，歐盟最終將會消失。
熊性狡猾神出鬼沒
將目前情況形容為與美國大蕭條前後相比，商品大王唔係第一個，但市場就不聽老人言，繼續上升，呢個亦係股市常情，好多老兵見得熊市多，遇到升市自然有戒心，結果唔信唔信佢又升，有人仲忍到最後入番市，咁先畀隻熊咬親，因為熊嘅生性最狡猾，神出鬼沒，唔同牛咁橫衝直撞，熊會等到大家都唔信佢出現的時候，先至現身。
美國O依家息口向上，若然持續攀升，當然會戳破泡沫啦，要留意喺加息初期，通常經濟未受影響，數字仲會靚仔，咁央行先會不斷郁手，直至利息支出拖慢經濟。不過，股市通常未等經濟轉差，喺市道最熱時就會爆破，呢個亦係捕捉跌市最難嘅地方，所以O依家唔係大手買股嘅時候，大家亦唔需要完全離場，但就要保持警覺，控制住注碼。
港股昨日都算叻仔，高開後全日升勢穩定，恒指收報22494點，急漲348點，幅度1.57%，比上周五美股單日升幅仲大；國企指數收報9276點，升145點或1.59%，成交金額608億元。騰訊(700) 與滙控(005) 為升市火車頭，合力推動恒指91點升幅。騰訊漲2.28%，造188.8元；滙控升1.87%，造54.5元。聯想集團(992) 揚6.03%，造5.45元，為升幅最大藍籌股。
蘋果概念股舜宇(2382) 股價再破頂創上市新高，收造34.75元，揚6%，瑞聲(2018) 升0.3%，造75.15元；通達(698) 漲1.25%，造1.62元；高偉電子(1415) 升8%，收3.54元。
純官唔怕賊仔做世界
新世界發展(017) 主席鄭家純家族位於淺水灣道的一幢獨立屋發生爆竊案，事後純官都有出嚟講番兩句。以賊仔做世界偷去的財物，同鄭家財富比真係少過一條毛，有人笑言，新世界昨日升左上今年高位，市值單日升左22.8億元，以純官家族佔10億元計，淨係升值嘅數，1%都1000萬啦，真係任個賊偷到手軟，又偷得幾多先？
新世界昨日升勢有成2.63%，跑贏大市。呢隻股近年經常跑輸大市兼跑輸其他地產股，皆因佢負債較重，O依家美息回升機會大左，點解佢會跑贏大市呢？一個解釋係新世界發展已完成強制收購新世界中國(917) ，新世界中國已成為新世界發展的全資附屬公司，新世界中國股份將於明日起撤銷上市地位。咁即係話新世界可以自由處理新中嘅資產。新中有唔少靚嘢，而且之前又將內地嘅物業賣左畀恒大，會有資金回籠。目前新世界資產淨值係19.8元，現價一半都唔到，未來新世界股價表現如何，股民要睇幾個因素，包括佢係咪會大力減債，令佢資產折讓減低，以及私有化後家族成員都收番大筆現金，會唔會增持股份。
陸羽仁
金融High Tea 舊文
來源 source: http://hdfin.stheadline.com