智取大市：大市突轉強可博
■煤炭股開始由弱轉強，投資者可考慮此板塊股份。 資料圖片
昨日港股喺冇特別消息之下，由跌轉升，走勢同8月5日極為相似，都係貼近日線圖保歷加中軸，然後喺冇好消息之下突然轉強。如果重複8月5日走勢，後市似乎偏好。呢一刻好就好在，甚少人相信市況真升，即係未引到足夠散
戶入場，同時大成交派發訊號未算確立，正路係再升到單日成交大增然後派貨。當然，信圖表、信成交、信感覺之下，任何入市決定，都係比較投機，所以就算入市，捱價耐性只限於兩日左右。
中航信（696）同中國飛機租賃（1848）業績勝預期，股價就一去無回頭，實在有參考價值，只要動力夠就會搶住買，股價連升。下個對象應該係濠賭股，澳門博彩數據靚仔，昨日升得甚急，潮流興強開有條路，相信短線資金會視濠賭股為最佳出路，只要今日市況繼續唔錯，無論裂口高開企得穩又好，抑或逆市略為回吐又好，都可一博。
至於另一選擇，煤炭股一直有中央大力淘汰落後產能嘅利好因素支持，好就好在呢個因素有排都未見光死，因為淘汰落後產能嘅功效，冇多幾個月都難開估，加上開始由弱轉強，應該值博，揀股就揀中煤（1898）。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com