中環在線：中環50大元食頹西
華華喺堆填區晚晚食$22.5兩餸飯，要幾頹有幾頹，正所謂有乜頹飯未食過吖，撞啱早排有位喺中環返工嘅朋友，投訴話喺中環食咗個要50大元
嘅兩餸頹飯，當然要去見識一下啦。
華華上星期六中午時間去到呢間位於太子大廈嘅快餐店，50蚊一個兩餸飯唔包飲品，4個餸任君選擇，揀咗睇落正常、好難中伏嘅番茄炒蛋同椒鹽排骨。點知兩個餸都凍凍哋，只得白飯係熱嘅；椒鹽骨味道偏鹹，咬落乾過華華塊面，仲要硬到不得了；番茄炒蛋OK，只係冇乜味道啫。
雲吞麵差唔多70蚊
坐隔籬枱有位哥哥仔見到華華食兩餸飯，搭嘴話「畀50蚊食兩餸飯，得番茄蛋同翠玉瓜（似樣），真係好唔抵食！」Bingo，完全講中重點，所以佢就寧願畀多廿蚊左右食碗雲吞麵。
雖然話人在中環，飲杯咖啡都要40蚊，食餐晏仔預咗要一條紅衫魚先至落到樓，有快餐店提供50蚊兩餸飯已經係比較實惠嘅選擇。但實惠還實惠，餐廳提供嘅餸菜應該畀番少少heart，調番轉咁講，如果一間快餐店連頹飯都做得好，其他菜式一定唔會差喇，都係另類宣傳啫。
查實華華平日去中環食晏好少幫襯連鎖快餐店，事關行近中環中心好似機利文新街一帶，有唔少食肆一百幾十蚊已經可以好好食一餐。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com