經濟客艙：阿媽咁買樓好危險
■每逢有阿媽出錢買樓送畀囝囝嘅新聞傳出，總會叫人葡萄。 資料圖片
作為「Generation Rent」嘅我，即係泛指80、90年後出世，無能力負擔買樓嘅年輕人，睇到屯門一個新盤有好媽媽為囝囝支付首期兼供樓，隔住個芒都聞到葡萄酸味。囝
囝成功晉身有樓一族梗係威，有層樓揸手，即使係阿媽出錢買都唔怕認，就好似揸駕車貼咗馬會、3C會嘅標誌，係有家底嘅象徵，你講句「邊有錢畀首期呀」，冇乜人會理。
阿媽買樓送畀囝囝，家陣係再正常不過嘅投資。每次有新盤推出，總有慈父慈母喺附近，都係為下一代買個安樂窩。始終都認為，除非買樓一炮畀錢，否則由父母買樓兼畀首期，都係一筆負債。負債本身唔得人驚，問銀行貸款500萬或者1000萬，唔使計息嘅話，大家唔覺借錢有咩大問題。好多人為咗上車，同銀行做八成按揭，畀兩成首期。換句話置業後，成家人多咗八成負債，阿媽嘅積蓄同囝囝萬零蚊嘅人工，係咪足以抵擋八成嘅負債風險先係真正面對嘅問題。用網上嘅按揭計算機，假設阿媽、阿囝齊齊供一層約500萬嘅樓，寫囝囝個名作為首次置業買入，做足八成按揭連按揭保險，長供30年。媽媽畀100萬首期，每個月月供最少1.5萬，成家人嘅收入最少要有3.8萬蚊先頂得住。
我唔知道喺香港成家人每月搵近4萬蚊係咪好容易，但如果我係有阿媽送樓畀我嘅「幸運兒」，我會好貼地同阿媽講，我冇錢畀首期不如租樓住，人哋阿爸阿媽幫手供樓唔等於係正常，可以將供樓嘅錢成家人去轉旅行咪一樣咁爽。「衰仔！唔識諗！」其實唔係唔識諗，供樓風險不在於層樓，其中一個最大嘅風險就係樓價。個個都話唔使驚，樓價仲係咁升，其實先要驚咗先，邊有資產一路係咁升、唔會跌。樓價跌，我哋供咗樓，面臨資不抵債嘅高風險。當然有例外，一係有幾百、幾千萬身家嘅阿媽喺大廳，樓價點跌都唔使驚。如果唔係賣走層樓，先可以避開做負資產，到時我哋又住邊度先！阿媽聽完冇回應，可能我講嘅嘢，就好似阿媽係女人個個知，至於阿媽係咪有幾百萬身家從來都唔講我知囉。
Captain Cool
https://www.facebook.com/seeforcaptain/
本欄逢周一刊出
Captain Cool
經濟客艙 - Captain Cool 舊文
來源 source: http://hk.apple.nextmedia.com