笑到最後 - 高明 2016年10月31日
笑到最後：被偷走的這五年
■過去五年梁振英都成功用語言偽術避開好多難解決的問題。 資料圖片
今屆香港政府最大嘅政績，就係語言偽術。所有大小事情，只要政府覺得有難處，就用語言偽術推得一乾二淨，呢一招對於一般市民，甚至立法會議員，喺過去五年都成功耍開咗好多難解決嘅問題，令到梁振英可以hea足五年。
最近開始有人宣佈參選特首就發覺，原來語言偽術對官員完全冇用。先有財政司曾俊華反駁梁振英橫洲話事一說；胡官亦話橫洲事件模底冇可能冇文件。可惜佢哋咁遲先蒲頭，令香港錯失唔少搵食機會。
第一，2047年大限。梁振英上台後，樓價成功跑贏恒指。但係買樓要做按揭，最多可以做30年，2047年倒數30年就係2017年，如果政府有遠見就應該一早解決。始終當基本法到期，無講明即係跟中國接軌，地契寫幾多年都冇意思，就好似中國啲釘子戶咁，要收番就收番。𠵱家雖然放風叫人放心，但今屆政府嘅利益共同集團慣咗隨口噏，好似突然話香港冇「三權分立」。2047年大限如果唔白紙黑字寫清楚，就更加令人冇信心。
第二，過去五年升得最勁嘅股票就係騰訊（700），亦都印證手機科網最發達嘅時代。但係呢啲概念搵人集資都幾難，所以外國就有眾籌，去彌補不足。不過，香港過去五年對於科技發展，最大貢獻就係走去拉Uber，至於眾籌呢啲咁認真嘅題目，政府避得就避。現時香港「眾籌」要IPO，一間初創企業好難做到上市，近期證監會反而有agenda去令上市變得困難，政策方向同全球趨勢相反，亦都可以話錯過咗搵科技大錢嘅機會。
第三，電視劇集發展。本來上手政府開咗頭開放免費電視牌照。而香港電視（1137）劇集質素有機會開拓香港以外嘅市場。但係因為有人嘅私怨，錯過咗發展機會。香港電視劇唔能夠係國際上競爭，眼白白睇住韓劇、美劇周圍賣版權賺大錢，香港又錯失一個搵食嘅機會。
可惜肯出聲嘅人要臨尾先踢爆，令現屆政府大問題hea過，亦都令到香港繼續依靠炒炒賣賣，無法轉型。
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com