智取大市：學彤叔機會主義
■彤叔係個機會主義者，佢嘅成功唔會俾地理、語言甚至種族限制。 資料圖片
大概係九十後再上兩個generation，就係四大家族發跡嗰個年代，伴隨亦係香港平民百姓精英嘅一代。呢批人為咗改變人生，冒險由大陸遊水落嚟香港，佢哋血液就係流住一種機會主義。彤叔1943
年結婚後，拎住嶽父2萬蚊膽粗粗過嚟香港開舖；李兆基年少時走出comfort zone，由順德南下落嚟香港做生意。所以話，機會係唔會俾地理、語言甚至種族所限制。
當年香港咁細嘅地方，圍埋全部都係機會主義者，想唔發都難。或許英國佬搞積極不幹預政策，就係睇中香港人呢種特質，所以放膽畀香港人去衝，結果，呢個民族不負所託，打造一個蜚聲國際嘅香港出嚟。
呢個世界冇乜人一生出嚟腳下就遍地黃金；黃金，有時要離鄉別井去發掘，呢個年代已經更容易，因為有網絡，可以足不出戶去尋找全世界嘅機會，去賺全世界嘅錢，所以再冇藉口畀自己將機會狹義於地理限制。四大家族以前先有，𠵱家香港人冇？呢句講唔通。
所謂際遇，起碼有一半係靠自己膽識同製造機會。守株待兔等機會？其中一種就係我呢種股票散戶，一直滯留呢種層次，所以千祈咪學，學都要學彤叔。
講番港股，恒指上星期五急跌，令月線圖出現射擊之星，觀察過往30年月線圖射擊之星，冇一次能夠喺下個月升破射擊之星高位，即恒指10月難越24364，但射擊之星後月份亦少有大跌。而上星期五一跌後，恒指小時圖亦呈下跌三角形，確認上升動力不再，10月應該係波動偏弱市。即使周一挾高，似乎轉為高沽低買係10月較佳策略。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com