經濟客艙：狂人效應中國買佢怕
■特朗普未知做唔做到總統，已經嚇怕中國。 資料圖片
人總是為問題搵藉口。藉口，有時候難聽過粗口，仲要聽嚇出自邊把口。共和黨總統候選人特朗普冇喺美國總統大選首場辯論中佔下風，表現唔夠好係支咪收音差。要數到首場辯論贏家，只有賭墨西哥披索
升值嘅大戶。截至上星期三（27日）止嘅一星期，大戶賭墨西哥披索升值嘅長倉合約多4,339份至2.48萬份。不過又唔係個個估到希拉莉從容淡定，特朗普支咪又出事。多數大戶押注墨西哥披索貶值，短倉合約有11萬份。聰明錢做定對沖，只係唔怕一萬，只怕特朗普跑出當選。墨西哥央行行長卡斯騰斯近日表態反對特朗普當選，仲話呢特股狂人效應似足颶風，蹂躪當地經濟。大選未完，墨西哥披索今年已經貶值12%。
特朗普喺辯論講起墨西哥搶飯碗，佢都提到中國當美國做豬仔錢罌攞著數，又再講中國操控滙率。睇睇Real Clear Politics追蹤特朗普支持度嘅平均指數，跟離岸人仔滙價比較，情況同墨西哥披索滙價走勢相似。6月中特朗普嘅支持度曾回落至37%，離岸人仔滙價一度轉強至6.55水平；7月中特朗普支持度回升45.5%，離岸人仔價回軟至6.63附近。
特朗普刮起嘅颶風級效應，中國點都要做定防風措施。假如狂人入主白宮，聯儲局主席耶倫即時劈炮呼聲最高。屆時擔心美國息率走勢外，最怕特朗普用做生意嘅減債方式，解決美國債務問題，狂人話可以遊說債權人減債或者賤價回購美國國債，一句到尾債仔借錢唔還，揸住1.21萬億美元美債嘅阿爺點會唔買佢怕。
Captain Cool
https://www.facebook.com/seeforcaptain/
本欄逢周一刊出
Captain Cool
經濟客艙 - Captain Cool 舊文
來源 source: http://hk.apple.nextmedia.com