港元強 水浸街
2016年10月26日
中環飯局，焦點話題係人民幣呢一浪嘅貶值，人仔回落帶動港股調整，但大市跌到去兩萬三千幾點，又開始對人仔下插呈現抗跌力，有茶友認為，呢個可能係港元資產嘅保值作用發揮咗效果。
坡水都流入香港
人仔呢個星期仲係向下，中國外匯交易中心數據顯示，昨日佢兌美元收跌60點子，報6.7778
兌1美元，中間價再刷新逾6年新低。離岸人民幣則回升2點子，報6.7830，較在岸收市價低52點子。茶友話，十月份人仔回落，開始時有啲出乎意外，因為有部份人以為人仔正式入籃後，會帶動國際對人仔嘅需求，令偏弱接近一年嘅人仔會回升。點知入籃後匯價不升反跌，搞到有啲亂咗套，呢個情況可能O依家稍為穩定番啲。
部份人預期十月份人仔入籃後上升，呢個真係美麗嘅誤會，因為自去年底人仔轉勢，已經睇到人仔離岸價低，在岸價高，反映咗市場睇跌，中央就夾高，十月入籃理論上係減少政府干預，咁人仔點解會升呢？
有人以為入咗籃後各國央行會增持人仔做儲備，多咗需求，可以推升匯價。實情係央行呢啲買匯行為，同市場比只係有限規模，而且其他央行睇到美元係咁升，就算想買都唔會急掃，所以呢輪人仔下跌根本唔係意外，甚至可以話跌得已經算慢。
內地的專家，其實都有相似嘅分析。人民銀行研究局首席經濟學家馬駿表示，在新定價機制下，即使十月人民幣兌美元有所貶值，但兌一籃子貨幣保持穩定，相信如果美國聯儲局加息，對人民幣匯率預計影響有限。佢認為目前貨幣政策合適，未來將關注宏觀經濟和金融領域的變化，並會連同對房地產市場的可能影響一併考慮，近期多個城市推出樓市調控措施，令房價和房貸需求降溫，預計隨著時間過去，會令樓市銷售和投資步伐放慢。
人仔回軟對有內地資產同盈利嘅中資股有負面影響，但同時內地資金就頻頻希望尋求保值。茶友話，若論保值同美元掛鈎嘅港元就有優勢，皆因無論歐羅英鎊都有隱憂，甚至連新加坡元都無力，呢排流入香港嘅唔止內地錢，還有新加坡資金。
以前新加坡同中東錢都鍾意買英國嘢，O依家窒咗一窒，所以都有部份資金轉投香港，搞到香港銀行銀多到水浸街，逐步減低人仔回調對港股的震盪。
講起人仔偏弱，有乜投資啟示？茶友話強貨幣理論上有利資產、不利營商，所以樓房地產變相升值之餘，做遊客生意嘅消費行業就難做。趣怪嘅係，兩隻零售股莎莎(178) 同I.T(999) ，一隻盈警一隻盈喜，結果都有得升，莎莎話盈利會大跌，但股價竟然升近10%，報收3.68元，I.T就升咗3%。莎莎股價最差係上半年，當時股價同高位比已經跌咗七成，呢一季佢已經冉冉上升。資金入佢係因為貪高息，兼炒吓佢已經見底。
零售尋底 股價先炒
港元咁強，本地零售係咪見底真係見仁見智，莎莎同I.T近年逐步將經營重心由香港搬到去內地，其中I.T較為成熟，喺內地生意比重已經增加，今次中期賺3863萬元，不派息。公司盈喜主要係因為去年8月該集團的人民幣定期存款兌換為港元所產生的特殊非經常外匯虧損6680萬元，拖低咗基數。
做零售特別係時裝品牌，喺今日咁環境可以有錢賺，管理層已經算好嘢啦。而家佢市值唔夠40億元，計市值算係好炒嘅中型股。
細股炒炒吓，大股就呆呆吓，恒指收報23565點，跌38點；國企指數收報9837點，下滑15點，成交金額555億元。大和話今年第三季澳門博彩商業績為去年第一季以來最佳，上調銀娛(027) 和金沙中國(1928) 投資評級，銀娛升2.8%，報31.45元，為全日最醒藍籌。雖然零售股有得炒，但百麗(1880) 中期純利跌近兩成，股價插逾9%造5.07元，為包尾藍籌股。
陸羽仁
金融High Tea 舊文
來源 source: http://hdfin.stheadline.com