自成一格：如果梁振英日日問你拎一蚊
■香港政治捐獻方面落後，無個人捐款上限又唔使開名，所以就算梁生想連任都唔會日日叫你捐1蚊。 資料圖片
情景題：如果梁振英參選下一屆特首，一日3個電郵4個短訊叫你捐錢支持佢，你會有咩感受？
美國大選去到尾聲，仲有不到一星期就會知道邊個登上總統寶座，
拉票活動亦都越演越烈，越野兔上星期開始用支持者的身份，分別訂閱了特朗普及希拉莉的競選網站，想睇下有咩拉票活動和最新消息。
可惜，不到一日就後悔，無論是特朗普或希拉莉，每一日起碼寄3至5個電郵，加多3個SMS是基本……「你做唔做義工呀？唔得閒呀？捐1蚊美金畀希拉莉啦！」「特朗普在俄亥俄州、愛荷華州領先，而家仲有佛羅里達州添，捐3蚊美金啦！」就好似一個無所不用其極的小朋友扭你買玩具咁，又或者好似有個乞丐，喺你屋企門口長駐，然後每次行過都問你拎一蚊咁。
點解要咁煩膠日日要人捐1蚊、捐3蚊呢？在美國選舉上，少於200美元捐款不用記名，而小額捐款反映到支持者的力度及多寡，算是一個另類民調，但中間太多水份，不能夠完全反映。過去希拉莉所籌得的小額捐款都大幅領先特朗普，其中一個原因是希拉莉競選辦叫支持者做個小登記，針對特朗普經常在社交媒體發牢騷的特質，每次他發一條Twitter，就信用卡自動過數捐款25美仙畀希拉莉，藉此谷高自己的小額捐款。
大選前夕氣氛越來越熱，兩位候選人的捐款數字亦屢創新高。特朗普競選辦最新公佈，10月的小額捐款金額達到1億美元，而希拉莉方面，10月份的數字仍未公佈，但單看9月份已經創新高達1.5億美元，所以10月有機會再創新高。
反觀香港社會就唔太興呢套玩法，政治捐獻方面落後到飛起，無個人捐款上限又唔使開名，你鍾意點捐都得。所以就算梁生想連任，都唔會日日叫你捐1蚊，反正唔使理你哋支唔支持，最緊要冧掂阿爺同埋嗰1,200人，公關宣傳都會做少少嘅，行嚟行去表示自己會做好呢份工；或者拎張摺凳落區扮下嘢咁囉﹗
越野兔
https://www.facebook.com/Sailorrabbit/
本欄逢周五刊出
越野兔
自成一格 - 越野兔 舊文
來源 source: http://hk.apple.nextmedia.com