陰跌悶局
2016/11/04 08:33:33
網誌分類: 經濟
週四美股朝早靠穩，以為可以終結七連跌，點知都係唔掂，中午又再下滑，再以微跌收場，連跌第8日。杜指收市跌29點，報17931點，跌幅0.2%；標普500指數跌9點，收報2089點，跌幅0.4%，納指受蘋果公司下跌拖累，繼續跑
輸大市，跌47點至5058點，跌幅0.9%。科技股及醫療股繼續係拖低大市的元兇，下跌1%，繼續要捱新總統將整治行業的效應。
股市跌幅唔大，但股票恐懼指標VIX指數就越升越高，昨日在大升14% 至22，係今年6月20日以來高位，一路帶住大市向下。
Wunderlich Securities首席市場策略師Art Hogan表示，雖然美國昨日公佈的經濟數據好壞不一，10月ISM非製造業指數差過預期，而第三季生產力增長3.1%，好過市場預期的2%，首次申領失業救濟26.5萬人略低過市場預期的25.8萬人，但整體而言，近期經濟狀況其實唔錯，美企盈利普遍好過預期。至昨日為止，標普500成份股，已有289家派了季度成績表，當中有73%盈利好過預期。
另外，外圍經濟靠穩，繼歐元區受惠於工業及服務業的樂觀情緒上升，上週五公佈的10月經濟景氣指數遠遠好於預期之後，英倫銀行昨日宣佈維持利率不變，又預期今年GDP增長2.2%；2017年增長1.4%，都好過市場預期。
美國本地和外圍經濟都好，但股市獨弱，主要與大選的不確定性有關，投資者唔敢入市，美股就一路陰陰跌，加上標普500指數跌穿埋重要的心理關口2100點，美股就更加難以走出呢個「泥潭」。
市場依家估計標普500指數將會向下挑戰200天平均線，即2082點，要睇美國今日公佈的10月非農就業數據，如果大幅好過預期，可以沖喜一下，暫時頂住跌勢，如果勞動市場無甚驚喜，相信大市在大選前都好難頂得住慢跌之勢。
U.S. Bank區域投資總監Tim Dreiling話有投資者想趁大選呢個機會炒作，但都唔敢落手，今屆的美國總統選舉，實在有太多不確定性，很多事情都令人大惑不解，例如與特朗普這樣一個「傻佬」，居然可以走近當選美國總統這一步。
美國股市就同步出現「奇怪」表現，打破了以前的慣例。過往，總統大選的前一周股票通股市通常都會做好。對Bespoke的研究顯示，由1928年到上屆大選，標普500指數平均升1.8%。23次美國選舉當中，今屆係第三次在大選日一周前下跌，而最近的8個交易日，標普500指數已經累積跌幅2.9%，美國大選在下週三舉行，目前見到的民意調查，特朗普的支持度已有超過希拉莉的勢頭，不確定因素有加無減，大市呢幾日都好難有運行。
我了解到美股投資者的心態是不信特朗普會當選，但有少少怕萬一成真，所以投資策略保守，不再入場，或者買啲期權做保險，但亦不想大力減倉，因為他們問心個句仍然不信特朗普會當選，覺得胡亂沽貨希拉莉當選就呻笨，故此出現這種陰跌的悶局。
陸羽仁
回應總數(1) 會員回應 | 非會員回應
2點
回應載入中，請稍候... 
本網站之所有網誌文章及回應內容均屬網友其個人意見，不代表「頭條網」之立場。
陸羽仁 BLOG 舊文
來源 source: http://blogcity.me