股民買定保險
2016年11月04日
橫看成嶺側成峰。美國聯邦儲備局開會，為下月加息放定聲氣，港美股市隨之碌低，但跌幅唔算多，咁係咪好現象，中環茶友就大打口水戰。
認為係好消息嘅茶友認為，美國擺明會加息，但港股都仲係跌咁少，證明市場慢慢消化呢個消息。過去美元多數喺加息前強，加息後
弱。美國實體經濟唔見得好強，年尾加完可能就有排等，如果係咁，人民幣應該會喺未來慢慢轉趨穩定，對後市應有好處。
想儲貨要有耐性
看淡嘅保守派茶友就認為，美息向上，內地又限制資金南下。香港O依家瓣瓣生意唔掂，得番地產撐住，但啟德地賣到天價，咁搞法點支持到落去，所以咁好價都唔見地產股爆升，喺咁環境你話港股點有條件炒上先。
對於大市，陸羽仁短期比較偏向保守派茶友嘅意見，目前全球幣策唔明朗，加上美國大選有變數，睇番股票恐懼指標VIX指數近日不斷攀升，前晚再漲4%至19.32，顯示有交易員正不斷為大市未來的波動增加買定保險，不少投資專家紛紛發出警告，提醒投資者要執生。好友照計唔敢大手掃貨，個市唔似會好快升上去。同一時間要記住係，大戶做嘢通常會行先一步，唔排除佢哋會係喺美國大選有結果同實際加息前就出招，所以如果個市落啲，港股抵買咗，有銀在手者都可以入啲貨，反正個市唔似好熱，分段耐心儲吓貨，好過太急執嘢，又或者過份睇淡咁極端。
茶友講到內地財團海航勇奪啟德地皮，我覺得唔多唔少有避險作用。
人民銀行上海總部剛發佈落實上海市房地產調控精神的相關決議，稱要繼續加強對首付資金來源的審查，強化對借款人及其配偶收入證明真實性的審核，審慎評估借款人家庭償債能力，嚴禁變相規避調控政策和住房信貸管理規定。決議同時要求各商業銀行要切實防止信貸等各類資金，尤其是理財資金違規進入土地市場。內地樓市加限，咁有興趣落嚟香港搞地產嘅內資必然增多。
地價貴到too good to be true
海航集團透過旗下香港海島建設地產，以88.37億元投得九龍啟德住宅用地，折合呎價約13500元，創咗東九龍新高，打破咗保利置業於2014年2月以每呎地價6530元投得同區另一幅用地的紀錄，成啟德新地王，業內預計落成後銷售實用呎價可逾24000元。好坦白講，呢個價錢唔係香港人負擔得起嘅樓價，亦唔保證投地財團必定可以賺錢離場，但對佢哋嚟港，喺香港買塊地學吓嘢，只係用面嗰浸錢落注啫，又有乜所謂喎。
雖然賣地成績too good to be true，市場仍擔心美國下月會加息，恒指係咁意都要再跌過百點，失守22700關。尾市跌幅擴大，以全日最低位收市，恒指收報22683點，下滑126點；國企指數收報9482點，下跌37點，成交金額548.77億元。加息預期升溫，令本地地產股向下，九倉(004) 跌2.6%，報57.45元；新地(016) 降1.28%，報115.8元；會德豐(020) 跌1.14%，報47.6元。不過，深港通全球路演獲市場積極回應，帶動中資券商股逆市略為造好，中州證券(1375) 升1.8%，報4元；海通國際(665) 漲1.21%；華泰證券(6886) 升0.75%，報16.14元。
陸羽仁
金融High Tea 舊文
來源 source: http://hdfin.stheadline.com