智取大市：特首選戰鬥賣港
■選特首前先嚟加辣，不難看出背後嘅政治任務。 資料圖片
上周五梁振英、曾俊華出席公佈辣招，選特首前邊個咁得閒搞大壇嘢？連中央唔叫唔做嘅梁振英都仆出嚟，一定係中央意思。記者會上梁振英當曾俊華空氣，點知曾俊華不惜當眾插嘴，證明場政治show嘅重要性，今次辣招係中
央落嘅order，二人必須邀功。
講番辣招，買第二層住宅要劃一支付樓價15%稅項，較原本按樓價遞增至8.5%嘅稅率大增，即係打壓投資需求。樓價咁貴，升鬥市民本來已買唔起，泡沫出曬嚟先加辣？真係為港人著想？睇睇眼前人民幣形勢！離岸價CNH貶到紀錄以來新低，外滙儲備面臨新一輪走資潮。說穿了，中央要求香港加辣原因係——防．走．資！
之前中央大大聲話唔驚外資流走，容許外資自由進出，但走資呢家嘢，其實最驚係自己人走，因為外儲多多都唔夠賠。所以先有銀聯禁無限碌卡來港投保，亦傳Bitcoin出境換外滙落閘，家陣加辣等於逼香港人順從內地防走資嘅政治任務。收到嘅稅，除咗起香港人唔點用嘅高鐵外，總有其他倒水方法，「取之於民，用之於中央」容乜易，睇嚟中央先係大贏家。
今次辣招，睇得出梁振英政治上仍有本錢，雖然曾俊華可謂港人眾望所歸，但千祈不要睇小CY連任機會。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com