股市待變 車位癲炒
2016年11月18日
美國十二月份睇落加息會成定局，股市仲要消化呢個消息，住宅受加辣稅打擊，開始出現撻訂個案，有段時間相信都無得炒。喺本地息口仍然超低，人仔又腳軟無人敢揸重貨下，資金流入車位市場。最近仲有發展商搞出補貼租金貴賣車位嘅招數，可見車位炒風已到白熱化。
車位近年升幅顯著，唔少地
方嘅車位升值快過住宅。呢近車位炒風有兩個火頭，都係政府點起，一係佢重手加辣招稅；二係房委有意加車位租金，幅度傳聞達5、6%，遠遠跑贏通脹，於是令車位借勢起動。有中環茶友早兩年已開始睇好車位，背後理由同樣又係政府推動。政府唔想咁多人揸車，最好個個去搭地鐵，於是想出個政策，就係唔好起咁多路、唔好批咁多車位，變相增加擁有私家車嘅成本，喺呢個政策下，車位咪好似樓價咁供不應求，於是就坐火箭上升。
補貼租金 高價出貨
香港集體交通其實好方便，好多人揸車係貪得意，所以雖然車位價錢因為供應少急升，但租金就完全跟唔上，部份地方車位租金幾年無起過，回報率由5、6厘跌到去2、3厘，變成有小小乾炒牛河味道。最近車位價錢飆升，有少少癲嘅感覺，有發展商乘機推啲車位出嚟賣，每個叫價過百萬，由於租金回報率低，於是佢就補貼兩年租金。呢種手法同兩、三年前舖市勁炒，有商場分拆舖位補貼租金貴價出售有啲相似，結果買家有乜下場唔使多講。
車位炒到咁，茶友話反映咗香港O依家缺乏投資渠道，住宅無得炒，寫字樓、舖位唔係人人買得起，股市好似缺乏主題。但佢話，市面仲係有好多閒錢，照道理股市回到咁上下，應該有承接噃。
茶友話港股無乜主題，呢樣都講得幾啱。O依家投資者觀望美國聯儲局12月加息後點取態，同埋等緊美元試頂，所以都唔敢落注，恒指全日上上落落，終於都要微跌，收報22262點，跌咗17點；國企指數收報9326點，下滑36點，成交金額623億元。
藍籌股中，宣佈咗季績嘅騰訊(700) 股價回吐，跌1%，報194.8元，大行普遍係認為業績對辦但無驚喜。摩根大通報告雖然預期未來2至3年，支付業務對騰訊利潤貢獻較小；不過，對支付業務前景看法愈趨正面。該行對集團成本架構看法審慎，由於競爭激烈，投放於內容視頻的支出增加，同時推廣線下支付普及的宣傳開支亦增。該行下調騰訊2016至18年非會計準則每股盈測3%、0%及1%，目標價由260元降至257元，相當於2016及2017年市盈率預測43倍及33倍，維持評級「增持」。
滙控(005) 於周三高見62元後持續回軟，周四走低1.7%，報60.4元。「債王」格羅斯質疑特朗普的經濟政策能否改變美國嘅產業結構問題，認為無一個總統能夠扭轉大局。特朗普嘅主張不利債市，債王對佢特別有批判性絕對唔出奇。金融同銀行股喺佢上場後累升唔少，由於新政策無論得唔得，起碼都要等時間落實，所以呢類概念股開始會有啲回吐壓力唔係出奇。
銀行金融股要唞氣
市場無乜大主題炒作，所以個別板塊有啲消息就會即刻炒吓。波羅的海乾散貨指數周三創一年新高，於是航運股及港股口繼續向好，金輝(137) 漲5.05%，報1.04元；中國遠洋(1919) 走高6.5%，報3.12元；中海集運(2866) 升4%。乾貨指數雖然反映運費反彈，但幾個月前航運巨企韓進財困嘅消息仲係歷歷在目。全球貨輪愈起愈大，船主起大船劈價搶客嘅習慣唔係咁容易改變，O依家航運股炒上主要係因為股價低殘走番轉，暫時仲係睇唔到有長期轉勢嘅條件。
陸羽仁
金融High Tea 舊文
來源 source: http://hdfin.stheadline.com