政經密碼 - 周顯
澳門賭場的魔高一丈
2016年12月16日
澳門賭場受中央措施影響。(資料圖片)
前幾天，和一位Macau friend吃飯吹水，我梗係循例問他，近日中央政府的措施，對他們的生意有沒有影響啦！
他說：「咁多年來，地下錢莊就好似賣白粉一樣，幾時合法過？依家只不過
係捉得比較嚴啲之嘛，生意咪又係照做，最多做得小心啲，同埋要求利潤高啲囉。」
我問：「咁銀聯呢？」
他說：「銀聯新政策的主打對象，是保險公司，保險公司都是大孖沙，仲有牌照在手，梗係唔肯冒險啦，但我哋，幾十年來都係咁做，都完全無影響呀。」
我奇怪地問：「幾十年來都係咁？點做呀？」
他說：「你去鐘錶舖買隻錶，十萬銀，咁你碌卡去買，隔籬有間當舖，俾你當番九萬五，鐘錶舖又有牌，當舖又有牌，仲有單有據，成張當票喺度，完全合法，咁點捉呀？」
我說：「幾十年前，在舊葡京，有一間東京珠寶，我都成日扮買珠寶，碌錢去搏殺啦，因為信用卡在銀行撳不到錢，唯有用呢招囉。估唔到今日仲有呢支歌仔唱。」
他說：「萬變不離其宗啦。」
我說：「咁出入口現金要登記呢？你哋又點拆呀？」
他說：「咁咪照登記囉。條友十萬元過來，帶五百萬元回去，全部有單有據，日後被人問佢，啲錢點得番來，他咪說在賭場贏嘅，嗱，俾埋張單你睇，有證明，以後洗黑錢仲方便呀！」
我嘆氣說：「這叫做道高一尺，魔高一丈。」
按：我之所以嘆氣，並非因為「魔高一丈」，而只是因為自己無份而已。
然後，我又問他：「咁係唔係依家澳門好好景，你哋唔使憂吖？」
他說：「咁又唔係，依家經濟不景，地產客仲有，但煤礦客就真係無曬，賭場生意就梗係差咗啦，我只係話，新政策對我哋影響不大啫。」
我問：「生意差咗，咁你咪好慘？」
他說：「唓，我哋咁多客，生意差咗，都照樣有錢使、有飯開、有女媾，同以前又有乜分別呀，賺少咗嗰啲，面嗰浸嚟啫。」
作者為小說作家、報社主筆、股票投資者，吃喝活樂的專家
回首頁
政經密碼 - 周顯 舊文
來源 source: http://www.am730.com.hk