小鷹翱翔市底弱
2016年12月16日
美國聯邦儲備局宣佈加息0.25厘，市場關注點係主席耶倫出嚟點講，究竟係放鴿抑或放鷹，結果係佢想放鴿放唔成，講法有啲鷹鷹地。消息公佈後，港股開市即插，全日低收近四百點。
儲局公佈議息結果，加息已係預期之內，外界焦點係儲局官員調高左來年加息次數嘅預期，由估計明年加息兩次增加
至三次，喺咁情況下，一向係肥鴿嘅耶倫都好難做好人。
大行唔信明年加到三次息
耶倫話，調高加息預期係因應新總統嘅經濟政策，同時否認自己講過會容忍通脹較高嘅言論。佢跟住都補吓鑊，話加息係對經濟信心嘅反映。
瑞信發表報告表示，聯儲局對經濟展望略呈「鷹派」感意外，更重要是將明年加息三次的預測。
加息結果公佈後，市場即刻有反應，美股杜指由喺兩萬關前徘徊變成下插118點，黃金價格都即時撻低。瑞信認為，聯儲局12月會議有「鷹鷹地」嘅傾向，該行就覺得，如果按數據作判斷，聯儲局須考慮新興市場國家潛在應對特朗普美國新政府的經濟政策，瑞信繼續認為美國明年只會加息兩次，分別會在明年6月及12月。
陸羽仁同兩個銀行家傾過，有大型商業銀行嘅總裁認為，耶倫開正名話特朗普經濟政策對利率有利好影響，其實新總統未上場唔知死啫，美國O依家有十幾萬億美元嘅國債，息口每加1厘，美國人就要畀多1800億美元利息，你估咁易頂呀，所以佢嘅傾向接近瑞信，認為儲局來年唔可以加到三次息。
另一位銀行家就比較接近央行思維，美國十年期債息昨日黃昏已經升到2.6厘，好快上到2.9厘係絕對唔奇，所以應該預期息口未來會「正常化」，亦即係會有較快嘅加息步伐都唔奇。
我認為兩個銀行家其實係講緊一個銀幣嘅兩面，佢地唔同嘅描述唔同部份，只係因應本身對息率上升速度嘅預期有啲唔同，兩人嘅共同點係未來息口仲有得再上，而且有可能會喺上半年就發生。呢個情況令我諗起去年底，美國加左第一次息，仲揚言全年會加四次息，結果搞到港股好弱，恒指反覆下試19000點，跌到2月才見底，後來爆出英國脫歐，全球暫停收水，恒指先至彈得高啲。若果用相同指標，我驚恒指未來仲要探吓底，尤其如果美股喺加息後當無事，調整後重回升軌，咁港股壓力仲大。
小心指數仲要探底
喺大市有可能尋底下，我覺得投資者要用穩陣策略，唔好咁急一注去撈底，避開息口敏感嘅地產股、房託，反而舊經濟股好似銀行、石油仲有機會炒吓反彈。
美國呢隻鷹仔一出，市場即起反應，內地債市跌到停板，人民幣中間價跟住貶值261點子，即期一度低見6.9355兌1美元，與中間價同創八年半新低。交易員認為，聯儲局未來仍有加息動作，將令人民幣繼續承壓，但監管層料仍會控制貶值速度，也不排除短期內藉美匯回調推動人民幣階段性反彈的可能。
受到「息魔」襲擊，內地國債價格大跌，仍然會困擾中資金融股，恒指低開後跌幅擴大，最多挫457點，低見21999點，22000點大關一度失守，並且迫近11月9日特朗普爆冷當選時的21957點低位。之後反彈唔大，恒指收市報22059點，跌398點，跌幅1.77%。國企指數收報9479點，跌226或2.34%，跌幅較恒指更大。成交增至808億元。
聯儲局鷹派佔上風，地產股全線下挫。新鴻基地產(016) 挫2.4%，收市報99.7元，失去「紅底股」地位。以高息作招徠的房地產信託基金，亦成為沽售對象。領展(823) 仲跌得勁，收挫4%，報50.4元。
內地金融股是另一重災區，美國加息令內地國債暴挫，或波及內險股和內銀股。中國人壽(2628) 跌3.9%，收市報20.7元，招商銀行(3968) 做左難兄難弟。恒指昨日喺22000點撐住，跌得多反彈吓唔出奇，但短期唔知阿爺點拆招同華爾街有乜反應，博反彈者都要小心佢彈完再試底。
陸羽仁
金融High Tea 舊文
來源 source: http://hdfin.stheadline.com