自成一格：Uber硬闖灰色地帶
■Uber推出自動駕駛汽車服務，卻有走灰色地帶之嫌。 資料圖片
無錯，又係佢Uber，周三於美國三藩市正式推出自動駕駛汽車服務，只不過當地汽車管理局（DMV）就即刻衝出嚟話佢未攞正牌。今次Uber推出的自駕車車款是與富豪（Volvo）聯手開發，車頂
裝上雷射雷達、無線技術以及7部cam，想打造全自動無人操控的Uber，不過現階段仍然會有工程師跟車，以及有個司機隨時可以捉住個軚盤。
據加州法律規定，自動駕駛汽車要有測試許可先可以在馬路上行駛，現時DMV就講明個車款在名單之內，所以是違法。Uber就繼續走灰色地帶，話加州對於自動駕駛汽車的定義係車輛「沒有人為主動操控或監視」，所以新車有兩條友睇實，絕對無犯法喎！
只不過，今日第一日在三藩市試行就被發現衝咗個紅燈，後來Uber就話呢個係人為錯誤，所以先要建立自動駕駛系統，電腦分析路況就最安全喇！到底今次呢個「無牌自動駕駛」拆唔拆得掂仍是未知之數，但次次Uber試新嘢都係夾硬闖關行灰色地帶，同佢個老友Airbnb一樣，以前一開始仲未成型就話啫，家陣好多人睇你頭搵食，下次搞新嘢之前，不如都係乖乖哋搞掂paper work先啦！
越野兔
https://www.facebook.com/Sailorrabbit/
本欄逢周五刊出
越野兔
自成一格 - 越野兔 舊文
來源 source: http://hk.apple.nextmedia.com