中環在線：
潘蘇通識食 放租要審核
今年尾最紅嘅財經人物非高銀金融（530）老闆潘蘇通莫屬，佢公司上星期擊敗新地（016）、長實（1113）等大地產商，奪得港鐵（066）何文田站上蓋物業項目，跟住又傳佢以25億元買南
區深水灣道75號大屋，唔講唔知，佢除咗鍾意買地買屋之外，亦好識食，開埋餐廳㖭呀。
一般發展商興建寫字樓，都會預留舖位，出租畀人做食肆，方便寫字樓租戶解決三餐；潘蘇通就比較特別，佢喺九龍灣新落成嘅高銀金融國際中心，入面4間食肆全部係由潘蘇通話事，總廚一定要過到潘蘇通嗰關先至得。
嗰度有兩間中餐廳，日式同法式餐廳各一間，其中一間高級中餐廳皇禦園，主廚係米芝蓮星級菜館明閣嘅前行政總廚曾超敬，食物質素有保證，又多廂房，私隱度應該幾高。
雲吞麵係至愛
不過，聽聞潘蘇通唔只鍾意fine dining，雲吞麵都係佢至愛。過去幾年，佢邀請香港傳媒參觀佢旗下位於天津嘅地產項目，亦有強烈推介入面嘅雲吞麵館，九龍灣高銀中心亦有間專食粥粉麵飯嘅普通中餐廳，可見佢幾咁鍾意食雲吞麵！
潘蘇通鍾意雲吞麵可能同佢出生於廣東有關，佢早年做電器貿易，目前主要投資中港地產，又係本港馬主，活躍於馬圈。根據《福布斯》，佢喺全球富豪榜排名205位，身家逾300億元。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com