內地慢車 買股慢行
2016年12月28日
港美聖誕補假休市，內地A股照常，星期一開始就傳出國家主席習近平在中央財經領導小組會議提出不必強守6.5%的增長指標，令到內地商品價格急跌，拉動內地股市當天上午急挫。其後懷疑國家隊入市力挺，令星期一A股尾段急抽，轉跌為升，星期二A股也只是輕微下調。
但內地容許經濟增長
減慢的消息，有可能會有第二波震盪，股民假後不能太過鬆懈，以為香港無開市就當避開左，當佢無事。
外電引述消息指，習大大在財經領導小組會議上提到，唔會強保增長指標。雖然話係咁講，但相信中央唔會撒手不管，估計指標會下調，但應該仍會力爭在6%以上，調低至6.2、6.3%較正常。
防維穩後有第二波餘震
早前領導人講內地樓市，提過「樓不是用來炒的」，相信會加大力度，避免房地產過熱，短期會有措施防止炒作，但內地樓市亦唔可以任佢失溫下墜，目標係要樓價唔好大上大落，保持經濟運作。
睇番成個大局，中央提出微降增長目標，不強求保住今年增長水平，多少有點「形勢比人強」的味道。外圍來說，美國利率向上，美元強勁。雖然話人仔匯價跌啲，有利中國出口，減低體制承受的壓力，但匯價偏軟，中央又要防止大量資金外流，以免出現大失血效應。匯價跌啲嘅利好影響要長遠小小先見到，但經濟失血即時衝擊就立竿見影，所以阿爺都要諗計頂住先，呢個大環境就限制左出手鬆銀根頂經濟嘅空間。
政治上嚟講，特朗普上台有點狂人大亨嘅味道，好似佢接聽台灣的總統蔡英文電話，都搞出連串餘震。對於白宮新主人有意測試自己底線，北京話預左奉陪，所以航空母艦遼寧號駛出西太平洋演習。雖然唔似真係郁手，但打吓貨幣戰、貿易戰唔出奇，喺咁環境下，若然中國仲訂個相對高嘅增長指標，咁咪即係話畀美國佬聽自己唔諗住埋身肉搏。O依家習大大放風話預左經濟唔達標，即係為自己減壓，暗示做好犧牲準備，等美國佬自己計數。從政治上嚟講阿爺咁樣係聰明嘅，但從投資上嚟講，大家就好難預明年氣候會係天朗氣清。
領導人話經濟指標會調低，消息令內地炒到癲嘅商品市場淋左桶聖誕冰水，黑色金屬帶頭推低商品價格，小心香港上市金屬股假後受壓。昨日A股變幅不大，滬綜指全日波幅僅14點，盤中低位曾見3113.75點，收市跌7點，報3114點，跌0.25%；創業板指數則跌5點或0.27%，睇嚟內地市場情緒暫時穩定番，但交投仍然偏低，反映股民神經仲係有啲緊張。
A股經過周一震盪，從前後市場表現睇唔排除阿爺早有準備，趁假日吹出利淡消息，減低衝擊，雖然中央做左工夫，第一波跌浪無香港份，但內地放慢增長呢樣唔會見左光就當無嘢。畢竟熱錢O依家主調係撤離新興市場返美國炒一轉，人仔匯價仲係受壓，內地唔力谷經濟，對礦業、金屬股以至其他經濟環節都少左拉動，喺咁環境下，買股自然不能太勇，點都要留番一着後手，想入都分段買好啲。
中港股市短觀麻麻地，但美股重開大家就睇杜指可唔可以破埋兩萬點先收爐，其中石油能源股表現都係破關與否的因素。紐約期油價上周五輕微高收，連續第6個交易日報升，除咗創17個月以來收市新高外，全周計更升逾2%，反映主要產油國達成減產托價協議，足以抵銷利比亞增加石油供應及美國石油存貨增加等利淡因素，繼續承托油價。
想買油股先忍手
上周收市前紐約2月份原油期貨價格上周五收市微升7美仙，升幅0.13%，每桶報53.02美元，為2015年7月14日以來收市新高。倫敦2月份布蘭特原油期貨收市升11美仙，升幅0.2%，每桶報55.16美元。全周計，紐約期油升2.16%，較前周的0.78%升幅有所加快；倫敦期油價則微跌0.09%。
油價好自然令人諗吓石油股係咪可以短走一轉，呢排我成日話油股已經係上落市走短線較穩陣對象。目前只係53美元一桶水平，都唔係算好平，買油股如果穩陣計最好都係等佢回一回先。
陸羽仁
金融High Tea 舊文
來源 source: http://hdfin.stheadline.com