中環在線：廖本懷細仔揸莊中國滙豐
■廖宜建（右一）40歲出頭已經成為滙豐中國區老總。
滙豐舊年初經歷人事大洗牌，馮婉眉辭任香港區總裁，黃碧娟升任大中華區總裁，中國區總裁就由廖宜建（David）擔任，呢個名好似冇乜人聽過，其實佢係回歸前香港首位華人政務司廖本懷嘅細仔，亦係滙豐明日之星
，噚日佢終於真人露相。
40歲出頭已經成為老總嘅David，昂藏6呎，為人比較低調，好少見香港傳媒。噚日佢出席滙豐中國自家品牌信用卡啟動儀式時，以一口流利普通話介紹，又講述中國零售銀行發展願景，之後喺台下同內地官員通場交際，亦都友善同傳媒換卡片，但說話唔多。
David畢業於倫敦大學，修讀日本研究及經濟學，畢業後曾經任職一間日資銀行，1997年加入滙豐後，主力睇大中華區及新加坡嘅定息產品業務，2005年升任滙豐中國環球市場主管，因有出色表現，舊年升任中國區總裁，喺滙豐極力發展大中華業務嘅今日，年紀輕輕前途無可限量。
David有老爸廖本懷嘅影子，廖老係建築師出身，大約30歲已經負責華富邨嘅建設項目，可以容納5萬名居民，媲美歐洲一個小城市，年輕有為。佢早於1989年退休，大仔廖宜康承父業成為建築師，細仔David就做銀行家，應該都老懷安慰。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com