財路：新晨奀爆有望發威
■新晨動力PE平絕同系，現價買入考慮得過。 公司網頁
華晨（1114）由上年2月6蚊邊位，到家陣累升66%，同系新晨動力（1148）未鬱過，講PB，全系至抵；講turnaround，新晨一樣有睇頭，冷灶煲得過。
新晨主打汽車發動機，兼有向華晨寶馬提供呢瓣產品。華晨
一年累積升幅勁，主要係華晨寶馬尤其上年下半年打後，錄得唔錯銷情，而華晨股價一支箭之後，家陣近2.3倍PB，華晨系統金杯汽車（滬600609）一年翻一番，家陣PB過40倍、申華（滬600653）3.7倍。
新晨又點？現價1.15元，一年嚟未鬱過，比起基金大孖沙鄧普頓最大撼增持一板每股成本價1.86元，潛水38%，三年累跌近80%，潛喺三年底，PB得0.47倍！再講，華晨寶馬銷情好，照計，新晨分享到部份成果，表現唔應該咁差。
新晨獲寶馬授權組裝王子發動機，喺體積、技術及油耗等方面，更有睇頭，而新晨15年半年成績單講明，呢款發動機會喺今年推出，集團兼已經成立專門營銷王子發動機，市場反應亦正面。新晨有強勢新產品接力，今年照計有力turnaround。
內地報載隨住寶馬國產化，嚟緊幾年按市場需求，國產化車產能可以增加到每年40萬台，而單喺今年寶馬國產車型將會增加到六款；寶馬國產化對新晨嚟緊講肯定有著數。場內專業評估，新晨今年EPS0.24港元，得4.8倍PE，又係平絕全系。新晨家陣市值14.8億元，華晨市值544億元，係新晨37倍，新晨市值細奀到爆，俾母系湊大，唔難。
買新晨，煲今年業績開始發威，就算翻一番到兩蚊樓上，預測PE都未過10倍，仲未上到上市以嚟平均12倍PE之餘，目標價PB亦只得0.9倍多少少，亦未追到最近磅嘅申華。
錢雋
細價股專家
本欄逢周二刊出
錢雋
財路 - 錢雋 舊文
來源 source: http://hk.apple.nextmedia.com