油服股食正西風
2017年01月10日
美股上周差少少就可以衝破兩萬點，但差啲就係差啲，結果最後收市前都一路無法升破，不過，最近美國經濟數據相當強勁，無論係就業抑或係增長，都保持良好勢頭，有中環茶友預計，杜指喺新總統上台前，好有機會可以破關。
呢個星期美國會公佈多項經濟數據，
其中零售銷售較受注視，市場已經估計去年12月升0.7%，是連續第四個月上升。同樣，密歇根大學消費者情緒指數料升至接近13年最高後，本月初值預期進一步升至98.5。
美國數據反映經濟升溫
另一個公佈嘅數據係首次申領失業救濟人數，市場估計連續兩個月下跌，貼近43年來最低後，料上星期回升至25.5萬。通貨膨脹方面，上月生產物價指數估計升0.3%，是連續第二個月上升。扣除食品與能源價格的核心指數，估計升百分之0.2，相信會連續第二個月上升。至於其他數據包括批發與企業庫存、銷售、進出口物價、消費者信貸及聯邦預算開支。
美國經濟壯旺，對港股有辣有唔辣，辣嘅係息口會向上多啲，有利嘅係經濟會旺左，一個較明顯係呢排油價都比較硬淨。上星期五布蘭特期油造好，創出近期高價，中石油(857) 一度高見6.27元，創一年新高，收市都升2.3%報6.18元。呢排中資「三桶油」以中石油較強，中石化(386) 次之，都升左0.9%收報5.87元；但中海油(883) 就弱啲，三隻中係佢要跌0.9%，報收9.86元。
其實油價O依家已經唔算太低，若然係呢個水平，油公司嘅投資可能會多番，所以石油服務公司嘅受惠程度仲大過油公司。昨日油股有得升，油服股直情有得炒。巨濤海洋(3303) 爆升40%，報收1.2元；華油能源(1251) 大漲12%報0.76元；百勤油服(2178) 收漲10%報0.54元，其他安東油服(3337) 、宏華(196) 、海隆控股(1623) 都升得唔錯。
巨濤畀人當殼股炒
睇番昨日爆升嘅巨濤，主要業務為向油氣行業與船舶製造提供包括製造與技術支援服務在內的綜合服務。由於石油服務陷入低潮，去年上半年出現虧損，如果情況持續，真係前景堪虞，所以股價最低跌過去0.455元，市值得番三幾億銀，形同殼價，所以一旦炒反彈，股價就由低位大力抽高，如果講炒作，呢個板塊就食正美國經濟向好嘅風向。
另一類得益美國經濟嘅係傳統銀行股，因為加息可以改善佢地嘅息差，冷門股大新金融(440) 收市報56元，創左一年新高，中環茶友話，大新金融於6月初宣佈與福建泰禾投資達成協議，以80億元向其出售旗下大新人壽及澳門人壽；另雙方簽訂15年期獨家銀保分銷協議，大新人壽及澳門人壽將向大新銀行支付總計26億元的代價。管理層講過，集團完成出售港澳壽險業務後，將會派發特別股息回饋股東，但交易仍有待監管機構和股東批准。至於交易所賺的逾40億元中會有多大比例撥作特別股息都要等董事局決定，不過計計時間，可能又係炒作派特別息嘅時間嘞。
講番個市，美股今個星期隨時破關，恒指周一最多升123點，其後因市場仍觀望特朗普就職，升幅逐步收窄，更一度倒跌27點，低見22476點，午後反覆向好。恒指收報22558點，漲55點；國企指數收報9602點，跌8點，成交金額513億元。
陸羽仁
金融High Tea 舊文
來源 source: http://hdfin.stheadline.com